Насловна

Белград - град на две големи реки

Шарените крави го окупираа Белград. Тоа се инсталации што веќе стојат на улиците, па дури и на Калемегдан

Од нашиот известувач
Жаклина Ѓорѓевиќ

Белград - Лесно е да се биде странец во Белград. Веројатно е најлесно за оние што сега живеат во поранешните југословенски републики бидејќи ако ништо друго, барем сличностите во јазикот ќе ви помогнат да се снајдете на секој чекор. „Да, повелете“ - ќе ви каже секој на кого ќе му се обратите за помош ако не го знаете правецот каде треба да одите и што да најдете, дури и ќе ве однесат до најблиската станица или место од каде што полесно ќе можат да ве упатат каде сакате да одите.

А во Белград навистина има што да се види - големата тврдина Калемегдан, познатата улица „Кнез Михајлова“, кафеаните на доковите. Но, да не ги заборавиме и многуте мали бутици, дуќани и ресторани, кои ве мамат да ѕирнете во нив со блескавите реклами и излози откако ќе влезете во некој од огромните белградски трговски центри, кои ги има речиси секаде.

Изборот на „Кнез Михајлова“ е неверојатен - многу ресторани и кафулиња со отворени тераси, кои ви нудат кафе и мафин на топлото сонце, додека река луѓе поминуваат покрај вас, шетајќи во дуќаните во едно од најпосетените места во српската метропола.

Но, она што деновиве најмногу привлекува внимание кај сите оние што го посетуваат Белград се шарените крави, инсталации, кои веќе извесно време стојат на улиците, па дури и во самата тврдина Калемегдан. Со најразлични шари, сини или, пак, во бело-црна варијанта тие ги привлекуваат туристите, кои веднаш застануваат да се сликаат покрај нив. Но, оние што сакаат навистина да покажат дека биле во Белград, сепак, заминуваат да се сликаат на местата што се вистински белег на некогашната престолнина на југословенската федерација. Каком на пример, Калемегдан, место каде што Сава се влева во Дунав, а од каде што има прекрасен поглед на цел Белград, мостовите, реките и бродовите што поминуваат оттука. Огромното зеленило и урбаниот лик на градот можат да се видат и од малите вовчиња што кружат низ патеките покрај тврдината во калемегданскиот парк, која има богато историски минато.

Странските туристи, кои, пак, сакаат да одат во шопинг, можат со часови да шетаат по многубројните модни куќи и продавници низ Белград. „Зара“, „Манго“, „Мекс“ се само дел од брендовите што се нудат деновиве со неверојатни попусти, а речиси и да нема продавница без попуст, така што изборот е голем. Некои парчиња облека можат да се купат и за 10-ина евра, иако, всушност, се купува брендот, а не самиот производ. Но, во Белград знае да биде навистина скапо, што може да се види и по понудите во хотелите каде што едно ноќевање достигнува цена и до неверојатни 250 евра. За оние со поплиток џеб, сепак, има места и за дваесетина евра, а некои од нив се сместени и во центарот на градот.

Во Белград не само што се испреплетуваат различни култури туку може да се види и исклучително развиената мрежа од сообраќајници. Трамваи, автобуси, таксисти и река автомобили постојано има на белградските улици. Не поминува буквално ниту минута, а веќе на постојката стигнува трамвај со истиот број, така што не е голема штета ако пропуштите некој. Може да одберете и автобус бидејќи цената за возење со трамвај и со автобус е иста, па дури и билетите се исти и чинат околу 25 денари.

Но, внимавајте на раскрсниците - едно поминување на улица каде што нема пешачки премин ќе ви го олесни џебот за 5.000 динари, или некаде околу 50-ина евра. На секоја раскрсница, како што ни кажаа белграѓани, има камери, па ако ви се случи да поминете на црвено, за извесно време на домашна адреса ќе ви стигне известување со солена казна од 250 евра со фотографија.

А кога ќе падне ноќ, се палат светилките на доковите под калемегданскиот парк, каде што трешти стара ЈУ-музика, која асоцира на некои минати времиња.

Интересни места

Калемегдан - Едни од најинтересните места што, секако, не треба да се пропуштат во Белград се Калемегдан и Белградската тврдина. Калемегдан е платото каде што се наоѓа тврдината, а тука се наоѓаат и Воениот музеј, Градскиот завод за заштита на културни споменици, голем број спортски игралишта и угостителски објекти. Најстарите делови од тврдината потекнуваат уште од првиот век од новата ера. Во својата крвава историја Калемегдан бил рушен над 40 пати. Името му потекнува од турските зборови кале и мегдан, а Турците го нарекувале и Фиќир-баир или брег за размислување.

Купување

Шопинг-центар „УшЌе“ - Јуни е месец на попусти во Белград, а туристите што доаѓаат тука можат да одберат да купат интересно парче облека или играчки за деца во некој од трговските центри. Во еден од нив, во шопинг-центарот „Ушќе“, ќе ви требаат часови, а можеби и цел ден за да ги поминете сите дуќани што се распоредени на три ката. Во овој период од годината може да најдете продавници за облека од некој од познатите брендови, која е со пониска цена, а сепак е тренди. Ќе најдете и продавници за долна облека, обувки, но и за деца и играчки. А во оние каде што има детска гардероба и играчки, има и детско катче каде што децата ќе се забавуваат додека вие пазарувате.

Храна

Разновидност - Вкусовите на белграѓани се различни. Од обичен хамбургер и скара до азиска и вегетаријанска храна, се' може да се најде на вашето мени ако прошетате низ центарот на градот. Во сето тоа изобилство од ресторани и кафулиња, може да се најде ручек и за две евра, а гурманите би се задоволиле и со пообилен оброк, кој вклучува и салата, што во Белград може да се добие и за 5 евра. Но, не се малку и оние што сакаат зачинета вегетаријанска храна со азиски шмек, за што се чека и во редици. Изборот каде да се руча и вечера е разновиден, па ако не сте во близина на ресторан или на некое кафуле што нуди сендвичи, може да побарате и обична трафика бидејќи и таму се нудат спакувани јадења по пристапни цени.