Насловна

Од скопскиот аеродром насекаде низ Европа

Шпанија, Холандија, Германија, Турција се новите дестинации за директни летови од „Александар Велики“

Сања Наумовска

Модерен аеродром, повеќе летови, а поевтини карти. Конечно, и македонските патници ќе можат да почувствуваат дека не живеат на крајот на светот. Патувањето да не биде скапа авантура на европските аеродроми, туку задоволство. Аеродромот „Александар Велики“ ќе го поврзе Скопје со европските метрополи. Шпанија, Холандија, Германија, Турција се новите дестинации за директни летови што им ги ветуваат менаџерите на концесионерот ТАВ на македонските патници. По Лондон и Венеција, Барселона, Амстердам, Истанбул и Измир се градовите до кои ќе се лета директно и за малку пари.

„Моја цел е да го поврзам Скопје со некои европски градови. Да има авионска конекција покрај со Дизелдорф и со други големи германски градови. Можеби наскоро и со Амстердам, а веројатно и со поголемите градови во Шпанија. Ова се дестинации кон кои ќе целиме“, вели Мурат Орнекол, генерален оперативен директор на ТАВ.

Тој нагласува дека целосно реконструиран со модерна терминална зграда и продолжена писта, аеродромот „Александар Велики“ ќе ги задоволи потребите на секоја авиокомпанија, а македонските граѓани треба само да имаат желба да патуваат и да купат билети.

„Над 85 проценти од градежните работи на аеродромот се готови. Моментално се изведуваат завршните работи на новата терминална зграда и на продолжената писта. Свеченото отворање ќе се случи на 8 септември, два месеци порано од терминот предвиден во концесискиот договор“, вели Орнекол. Покрај новата терминална зграда, изграден е и нов карго-објект, како и објект за евакуација и противпожарна служба.

„Од септември македонските граѓани ќе полетуваат од новата зграда. Веднаш штом ќе ги добиеме сертификатите од македонските власти, изградените објекти ќе бидат пуштени во употреба. Преместувањето ќе го направиме само за една ноќ“, вели Орнекол.

Моментално има повеќе странски авиокомпании заинтересирани да оперираат од аеродромите во Скопје и во Охрид, но тие треба дополнително да се мотивираат, да се справат со сериозната конкуренција во регионот и да се одлучат да работат во Македонија.

„Тоа треба да биде заеднички напор од страна на патниците, на операторот на аеродромот, цивилното воздухопловство, а особено од министерствата за транспорт и за туризам“, вели Орнекол, и нагласува дека ТАВ е во добра комуникација со власта, која е расположена да преземе дополнителни чекори во насока да ги привлечат оние компании што се двоумат. Тие доаѓаат, според Орнекол, но побарувачката не е толку голема. „Ако тука имате десет нискобуџетни авиокомпании, тоа може нема да биде од голема корист за сите засегнати страни овде. Тие можат да се уништат меѓусебно“, констатира тој.

Македонскиот пазар е мал, а соседните земји многу подолг период се обидуваат да ги развијат и да ги промовираат сопствените аеродроми и аеродромски услуги. Авионите „Ербас“, со кои лета „Виз ер“, имаат по 180 седишта, а за да биде компанијата заинтересирана за пазарот, секој лет треба да има најмалку 150 патници. Македонија загуби и многу патници за време на настаните во 2001 година кога голем дел од нив беа трансферирани во Приштина. Целта на ТАВ е со квалитетната услуга на модернизираните аеродроми во Скопје и во Охрид, евтините билети и поголемиот број дестинации, патниците да се вратат во Македонија.

„Ние продолжуваме со маркетинг на сите наши аеродроми. Оперираме со вкупно 10 аеродроми, од кои 4 во Турција, 2 во Грузија, 2 во Тунис и 2 во Македонија. Учествуваме во неколку светски организации, повеќето од нив се во Европа, но понекогаш одиме и до Далечниот Исток за да ги рекламираме нашите аеродроми. Значи, никогаш нема да престанеме со тие активности, но за резултатите е потребно време. Пред да се донесе одлуката да дојде ’Виз ер’ во Скопје, беа потребни 10 месеци разговори со нив. Тоа не е лесен процес“, нагласува Орнекол.

Според оперативниот директор на ТАВ, се' уште е рано да се размислува за интерконтинентално поврзување на Скопје. Нискобуџетните компании не се заинтересирани за овие линии, а финансиската моќ на населението не дозволува почесто патување на подолги релации.

„Ако постои побарувачка, да кажеме на 200 или на 300 луѓе еднаш неделно да летаат директно од Скопје за Вашингтон, тогаш ние ќе најдеме некој што ќе го реализира тој лет. Но, мислите дека навистина постои интерес за тоа секоја недела, цела година да има толку потенцијални патници за летови што чинат 500-600 евра? Значи, во тој дел мора да се спроведе едно добро истражување пред да се донесе одлука“, потенцира тој.