Нема да се дознае дали „Ибар“ е фалсификат

Досието за врвот на ДУИ ќе се прераскажува како загадочен кодошки трилер, но никогаш нема официјално да се потврди

Оливера Војновска

„Ибар“, „Вујко“, „Мама“, „Стрелец“ заедно со досиејата што се во најава, во јавноста ќе се прераскажуваат како загадочен кодошки трилер. За нив ќе се говори во политичките кулоари, ќе се плетат и кафеански приказни, но правата вистина нема никогаш да се открие и официјално да се потврди. Досиејата се изработени во осумдесеттите и во деведесеттите години од минатиот век од СДБ на СФРЈ, поточно од српската служба. Оригиналите (кои единствено може да се вештачат) се во српските архиви и прогнозите на контраразузнавачите се дека нема теорија да ни ги дадат. Поранешниот директор на Управата за безбедност и контраразузнавање, Горан Митевски, е убеден дека станува за веродостојни документи, односно за копии на оригиналот. Меѓутоа, исто така, убеден е дека нема никакви шанси да ги добиеме оригиналните досиеја од српската служба. „Ниту една служба во светот не ги открива соработниците. Информации и податоци се разменуваат, но изворите никогаш не се кажуваат. Американската и британската служба имаат извонредна соработка, сепак, имињата на соработниците не ги даваат“, посочува Митевски.

Тој очекува и одговорот од УБК за „Ибар“ да биде: „фабрикувано-плагијат“, како што одговорија за „Вујко“ и за „Мама“, врз основа на споредба со идентични документи водени за други лица. Според него, констатацијата се однесува само на формата на документите. „Досиејата се од странска служба, тие се копии на оригиналот и не може тука да се вештачат. Така што, УБК воопшто не навлегува во содржинскиот дел“, вели тој. Во разговорот за „Утрински“ појаснува зошто е тоа така.

„Документите се работени од српската служба и без вклучување на македонската. Тие се правени во Швајцарија, без помош од Македонија. Според настаните, термините, деталите што се изнесени, се гледа дека не се фалсификувани, фабрикувани. Нема никакво сомнение дека се автентични. Ниту еден припадник на службата од која било држава од бившата СФРЈ да го седнете и да му кажете да направи досие врз основа на претходното искуство, нема да биде во состојба да го изработи вака прецизно и уверливо. Тоа ќе ви го каже секој што работел во тајните безбедносни служби“, раскажува Митевски.

Досието „Ибар“ му говори дека личноста на која се однесува била многу скапоцена за српската служба. „ Во записите се изнесени детали и пикантерии, така што очигледно дека бил многу добро воден од српската служба. Се гледа дека бил исклучително лојален соработник и им дал многу квалитетни информации за дејствувањето на албанска емиграција. Сигурно имал чести контакти со оперативниот службеник за тој да има деликатни информации за педофилски и сексуални склоности“, смета поранешниот прв контраразузнавач.

Не е изненаден поради тоа што сега во јавноста се пласираат информации дека досиејата се фалсификат. За него е разбирливо и тоа што луѓето што ги кодошел „Ибар“ изјавуваат дека не веруваат дека можеле да бидат интересни за денунција. „Тоа го прават од внимателност, па и од страв. Имаат семејства, нормално дека ќе бидат воздржани“, вели Митевски.

Неговата прогноза е дека нема да се отвори постапка за лустрација на високите функционери на ДУИ и дека целата приказна ќе остане недокажана. „Комисијата за лустрација ќе се потпре на одговорот од институции што не ги поседуваат документите (бидејќи се од српската служба) и ќе констатира дека нема основа за лустрација. Само тоа е формалната страна. Вистината нема да има официјална потврда, но ќе резултира со пресметка во албанскиот блок. Досиејата стасаа до врвот на ОНА, а ќе излегуваат и други документи. Па, колку и да тврдат дека се фалсификат, јавно ќе се појават лица што ќе се препознаат и ќе сведочат за веродостојноста на досиејата и ќе ги потврдат настаните“, предвидува Митевски.

Инаку, тој како директор на УБК немал никакви информации ниту за „Ибар“, ниту за другите досиеја. Според него, нашата служба, најверојатно, немала такви сознанија. „Во документите за ’Ибар’ има рачно запишана забелешка „Итно! Види со СДБ на Македонија“. Но, во нив нема потврда дека македонската служба била информирана. Колку што знам, во Службата нема досие или трага од такво нешто. До мене, како директор на УБК, не стасала таква информација“, вели Митевски.