Тренд

Ќелавоста повторно е секси

Недостигот од коса може да му послужи на мажот како совршено оружје против оние што би сакале да му дадат повеќе години отколку што има, а освен тоа помага и да дојдат до израз очите и структурата на коските

Во Кремљ се менуваа со совршено правилен редослед. Ленин бил ќелав, Сталин со коса, Хрушчов немал коса, Брежњев имал... Низата ја продолжиле Андропов, Черненко, Горбачов, Јелцин и Путин... Врвот на политичкиот развој во минатиот век го доживеала со Винстон Черчил и Клемент Атли, а со зголемување на густината на косата на водачите што ги наследиле овие моќни лидери, како да опаѓала нивн��та способност...

Минималистичкиот изглед веќе со векови е предмет на дебати и судир на мислења дали ќелавите мажи се попривлечни од оние со повеќе коса, повторно ги заинтригира модните полицајци. Овој пат фанфарите во корист на минималистичкиот изглед засвиреа од другата страна на Атлантикот и тоа под паролата „ќелавоста е повторно секси“.

Според индексот на најпожелните бричени глави во САД, кој по тој повод го состави „Волстрит џурнал“, на самиот врв на најпривлечни мажи (кои страдаат од андрогена алопеција, или намерно се избричиле) и натаму суверено владее легендарниот актер Јул Бринер. Него во чекор го следи пермормерот Џејми Фокс, кој веќе некое време го промовира краткиот „еж - изглед“, па Брус Вилис, Кели Слејтер и Андре Агаси.

Анкетите од типот дали ќелавите мажи се способни да измамат повеќе воздишки, главно, одат во нивна корист. Што тогаш ги поттикнува мажите да си прават мечкина услуга со непривлечното префрлање на остатокот на косата од едната страна на другата, како Доналд Трамп? - се прашуваат Американците.

Одговорите на машките соговорници поттикнати на разговор биле интересни. Некои сметале дека треба да се „навикнат на природното губење коса“, а имало и такви што признале дека едвај го чекале двенеделниот одмор за да ја избричат главата, по што речиси станале зависни од стрижење на „нула“.

Недостигот од коса може да му послужи на мажот како совршено оружје против оние што би сакале да му дадат повеќе години отколку што има, а освен тоа помага и да дојдат до израз очите и структурата на коските. А тоа е она што жените го забележуваат и го сакаат. (Ј.П.)