Поглед

Операција фудбал

Фарко Шакири

Фудбалот во Македонија се претвори во игри без граници во кои основната алатка на таа измислица, тркалезната топка, воопшто не е потребна. Фудбалерите пак, кои на овие простори таа иста колоритна топка ја туркаат бесплатно, или за дупла боза кај Апче се претворија во жртви на нивните фанови - боговите паднати на теме. Односно во поданици, а газди се таму некои „комити“, „балисти“ „војводи“, „чкембари“, „шверцери“.

Како награда за своето саможртвување поданиците од своите „претпоставени“ добиваат пресретнување и каменување на автобус (оделение во напад), качување на јарбол и симнување знаме (диверзант во акција), малтретирање на поединци(чистење на терен), меѓусебна физичка пресметка (тренинг за конечна разврска). Сепак, една таква, веќе лесно предвидлива пресметка нема да доживееме. „Војводата“ и „балистот“ од Тетово ќе мора да почекаат за својата нова блиска средба.

Полицијата по низа оперативни акции извлече логичен заклучок (можен клинч) и реши да превенира со препорака до ФФМ за одложување на натпреварот Тетекс - Шкендија. Политиката ете реши да го спречи дејствувањето на лажните поддржувачи на некакви вредности загубени во простор и време, на кои практично самата им креираше амбиент за нивно уживање.

Еден член на племето во филмот на Џејми Јус беше вчудовиден и скаменет кога од небото беше погоден со шише „кока-кола“. Овдешната јавност, пак, е здрвена од челичната тупаница на „кодошката улична револуција“. Кого сега и го интересира фудбалот, кога на сцена е друг спектакл. Затоа сите професионални фудбалери нека почнат да баратаат со топката по сите познати и непознати сокаци, а може и дворови. Можеби тоа е лекот да се врати интересот за фудбалот. Па не залудно постои домино-ефектот!