05.10.2011, 14:50 Промовирана книгата за лустрација
Фото: Киро Попов
Промоторот на книгата, директорот на Институтот „Евро-Балкан“, Јован Донев рече дека го поддржува процесот на лустрација и оти треба да продолжи.
Во Клубот на новинари во Скопје денеска беше промовирана книгата „Лустрацијата во Република Македонија-Коментар на Законот за определување дополнителен услов за вршење јавна функција“ од авторите Звонимир Јанкулоски и Марјан Маџоски.
Промоторот на книгата, директорот на Институтот „Евро-Балкан“, Јован Донев рече дека го поддржува процесот на лустрација и оти треба да продолжи. Но, според него овој процес требало да се направи многу порано, со осамостојувањето на Македонија.
Авторот Јанкулоски посочи дека книгата е поврзана со сеќавањата, затоа што, како што рече, не сака да биде роб на државно наметнато сеќавање. Книгата, додаде тој, извира од документите во Архивот. Таа, според Јанкулоски, е тука да биде сведок и да потсетува на времето на процесите на соочување со злото и потребата да се тргнат таквите луѓе од можност да раководат со државата и да донесуваат одлуки со граѓаните.
- Кога ќе ги видите досиејата тоа се обични листови хартија кои кријат човечки судбини, кои во времето на социјализмот повеќе или помалку значеле уништување на човечки животи врз основа на она што би се нарекло идеолошко денуцијанство, рече Јанкулоски.
Според него, комунистичкото минато во Македонија останува табу тема и после 20 години.
Историјата, како што истакна Маџоски, треба да остане на историчарите и да им служи на луѓето, а не луѓето да и служат на историјата. Смета дека е потребно помирување на, како што нагласи, страшно поларизираните политички струи во сегашната Македонија, во социјалистичкиот период и во подалечното минато.
- Треба да ги решаваме поголемите проблеми, да се интегрираме понатаму и тоа да доведе до обединување. Државата после се што направи за етничките заедници заслужува нивната лојалност да биде уште повеќе подигната и да почнат други процеси на ресоцијализација. Парадигмата на помирување и споделување на заеднички вредности, цивилизациски, наследни... треба да ја применуваме и со соседните држави, рече Маџоски.
Посочи дека на тој начин природно ќе отпаднат некои оптоварувања од минатото. - Ако не друго Македонија ќе има активна и конструктивна позиција која може секаде да ја презентира, а оние што не сакаат да ги презентираат тие разлики се легитимираат како фактори кои прават проблеми, додаде авторот Маџоски.
Тој рече дека во земјава има една бројка на луѓе кои се откажале од јавни позиции токму заради тоа што знаеле за своето досие, нагласувајќи дека Македонија е многу мала, а Законот за лустрација многу голем.
|
