Претседателот Иванов во посета на Романија

Иванов во Букурешт ќе има средба со неговиот романски колега Трајан Басеску со кого се очекува да разговараат за билатералните односи и за други прашања од интерес на двете држави.

Претседателот на Република Македонија Ѓорге Иванов од денеска претстојува во официјална посета на Република Романија.

Иванов во Букурешт ќе има средба со неговиот романски колега Трајан Басеску со кого се очекува да разговараат за билатералните односи и за други прашања од интерес на двете држави.

Во присуство на двајцата претседатели ќе бидат потпишани билатерални договори од областа на научната, економската и техничката соработка и од областа на туризмот. Од македонска страна двата договорa ќе ги потпише министерот без ресор во Владата на Република Македонија Веле Самак.

Покрај со романскиот претседател, Иванов ќе се сретне и со претседателот на Сенатот Мирчеа Џоана и со романскиот премиер Емил Бок.

Шефот на македонската држава ќе го посети и христијанскиот Универзитет Димитрие Кантемир каде ќе му биде врачена почесна тога на Сенатот на Универзитетот, а ќе положи и цвеќе пред споменикот на незнајниот војник.

За време на посетата на Романија, планирано е утре претседателот Иванов да се сретне со патријархот на Романската православна црква, неговото блаженство Даниел.
Иванов ќе присуствува и на Бизнис форум што ќе се одржи во романската Комора за индустрија и трговија, а ќе има средба и со претставници на македонското национално малцинство во Романија на која ќе им врачи Орден за заслуги за Македонија постхумно на Лиана Думитреску и на Константина Думитреску, актуелен претседател на Асоцијацијата на Македонците.