„Ноќта“ ги проголта макроата и клиентите кај МТВ



Полицијата вчера уапси група од дваесетина лица од кои четворица макроа, сопственик на мотел, полицаец и клиенти на малолетни девојчиња присилувани на проституција.

Акцијата под оперативно име „Ноќ“ беше спроведена пред Македонската радио телевизија, на кејот на Вардар, каде подолг период цвета проституцијата. Полициската истрага која што траела повеќе месеци открила дека пет девојки од неколку греадови, од кои три се малолетни, на возраст од 16-17 години, биле продавани на клиенти по цена од 1.500 до 3.000 денари. Девојките биле сместени во стан во населба Аеродром, од каде макроата секоја ноќ ги носеле на кејот на Вардар, каде биле принудувани да ги продаваат своите тела. Ноќните „дами“ за пари се проституирале во автомобили на паркинзите или во мотел во непосредна близина. 

Четворицата макроа, сопственикот на хотел, полицаецот и клиентите ноќта ја поминаа пред истражен судија во кривичниот суд.

Дел од уапсените се сомничат за кривично дело трговија со малолетници, односно се товарат дека во близина на зградата на МТВ кај кејот на Вардар подведувале девојки и ги принудувале да даваат сексуални ус��уги.

Инаку слични акции деновиве беа спроведувани и во Тетовско-гостиварскиот регион од каде што беа уапсени неколку сопственици на угостителски објекти како и девојки кои наводно работеле како келнерки и пеачки.

МВР најави за денес повеќе детали во врска со последната акција во близина на МТВ.