06.10.2011, 15:39 Музика од диџеи во двокатните автобуси
Класика наутро, напладне подинамичен ритам, навечер електронска и денс-музика. Ваква музичка подлога ќе има во новите автобуси.
Патниците во двокатните автобуси од денеска ќе се возат слушајќи музика по избор на диџеите Ицко и Ерик Фокс. Наутро класична музика, за пладне подинамична, попладне, пак, музичка подлога за порелаксиран амбиент, додека во вечерните часови електронска и денс-музика. Вакви авторски музички компилации од денеска ќе се слушаат во сите двокатни автобуси, а наскоро и во обичните украински возила. Идејата за унифицирање на музиката во превозот надлежните од ЈСП ја добиле по многуте забелешки на патниците дека наутро музиката „ечи“, а во некои автобуси се принудени да слушаат дури и резултати од спортски натпревари, оти шоферот играл спортска.
„Сигурно дека и сега нема да бидат исполнети сите вкусови, но се надеваме дека ќе успееме приближно сите патници да бидат задоволни од музичката подлога во автобусите, а истовремено ќе наметнеме и еден вид музичка култура. Диџеите Ицко и Ерик Фокс имаат искуство со слушателите, односно знаат што сакаат и што им одговара да слушаат, на пример, наутро, попладне или, пак, навечер“, рече Мишо Николов, директор на ЈСП.
Тој информираше дека со диџеите се договорил музиката да ја менуваат во зависност од актуелностите на музичката сцена, а наскоро во компилациите да ја вметнат и македонската музика, односно песните од цедето што го сними Агенцијата за спорт и млади во чест на 20-годишнината од независноста на Македонија.
„Во компилациите има и еден вид кратки рекламни пораки за веб-страницата на ЈСП, како и поучни пораки за патниците, на пример, ‘излезот е на задната врата‘“, дополни диџеј Ицко, кој се надева дека на патниците ќе им се допадне неговиот музички избор. (Дс.Т.)
|
