Вељаноски очекува позитивен извештај од ЕК




Претседателот на Собранието е уверен дека би требало да добиеме и датум за старт на преговорите оваа година.

Претседателот на Собранието Трајко Вељаноски очекува позитивен Извештај на ЕК за Република Македонија и највисока оценка за рабоатата на Парламентот.

- Убеден сум дека трета година по ред Собранието на Република Македонија ќе добие позитивна оценка, за што ќе бидам задоволен како претседател на Парлaментот, а за што заслуга имаат и сите пратеници и пратенички групи. Во оваа година што се оценува ние имавме турбулентни случувања, но сепак, Собранието покажа дека има капацитет да се справи со сите ситуации. Затоа очекувам Собранието да биде оценето со највисока оценка, рече Вељаноски на денешната средба со новинарите.

Претседателот на Собранието е уверен дека би требало да добиеме и датум за старт на преговорите оваа година, што би било добро не само за Македонија, туку и за целиот евроинтеграциски процес за Западен Балкан. Правото на употреба на вето, додава Вељаноски, Грција би можела да го примени при кое било отворање и затворање на поглавје по почнувањето на преговорите.

По координација со пратеничките групи, Из��ештајот на Европската комисија за напредокот на Република Македонија на патот кон евроинтеграциите ќе биде ставен на нова седница што ја закажал на 17 октомври.

Според договореното, Извештајот што во седиштето на ЕУ ќе биде презентиран на 12 октовмри, на Вељаноски ќе му биде предаден следниот ден од претставник од Брисел, бидејќи се уште не е именуван шеф на Мисијата на Унијата во Скопје. Очекува позитивен извештај и препорака за почеток на преговорите со ЕУ.

Меѓу точките кои ќе се најдат на таа собраниска седница се и изборот на претседател и членови на Државната изборна комисија, како и информација за бројот на невработени и сиромаштијата во државата на барање на опозицијата.

Вељаноски воедно информира дека на 18 декември во општина Сарај, ќе се одржат избори за градоначалник, по назначувањето на досегашниот градоначалник Блерим Беџети за министер за правда.

Како што посочи, изборите ги распишал врз основа на решение што го добил од Владата дека на Беџети му престанува градоначалничкиот мандат, а согласно законскиот рок неговиот наследник да се избере минимум 70, а максимум 90 дена од престанокот на мандатот.