05.10.2011, 12:41 „Кока-кола“ највреден бренд во светот
„Кока-кола“ и натаму останува најсакпоцена марка во светот, според најновата листа изработена од истражувачката компанија „Интербренд“, на која најголем раст на вредноста забележа „Епл“ кој сега се најде меѓу првите десет највредни брендови.
На првите десет места на листата на „Интербренд“ се наоѓаат само брендови од САД, а најдобро пласирана неамериканска марка е „Тојота“ на 11-тото место.
„Кока-кола“ се наоѓа на првото место на листата на највредни брендови на „Интербренд“ уште од 2000 година кога започна да се спроведува ова рангирање. Лани вредноста на „Кока-кола“ е зголемена за два проценти на 71,861 милијарди долари.
На второто место на листата се наоѓа „Ај-Би-Ем“, а на третото место „Мајкрософт“. Меѓу првите десет највредни брендови се наоѓаат уште четири ИТ компании и тоа „Гугл“ на четвртото, „Интел“ на седмото, „Епл“ на осмото и „Хјулит Пакард“ на десетото место.
Листата од десетте најскапоцени брендови ја надополнуваат уште „Џенерал Електрик“ на петтото, „Мекдоналдс“ на шестото и „Дизни“ на деветтото место.
Вредноста на „Епл“ минатата година е зголемена за 58 проценти и на тој начин производителот на популарните „Ајфон“ и „Ајпед’ се искачи од 17-то на осмото место.
- Работата не е во тоа што („Епл“) произведува убави работи, туку и создаде цел животен стил и начин на живот, изјави генералниот директор на „Интербред“, Џез Фремтон.
Според него, вредноста на „Епл“ е зголемена најмногу благодарејќи на доминантната позиција на компанијата на пазарот на таблет компјутери. - Ако ги прашате луѓето кои се подготвуваат да купат таблет, дури 85 проценти од нив ќе ви кажат дека ќе купат „Ајпед“. На пазарот не постои ниту еден конкурент кој има удел поголем од пет проценти, нагласи Фремтон.
Најголем пад на листата на „Интербренд“ претрпе финската компанија „Нокиа“, која падна од осмото на 14-тото место, при што нејзината вредност се намали за 15 проценти.
„Нокиа“ до минатата година беше најдоброрангирана европска марка, но овој пат таа позиција ја има „Мерцедес“, кој се најде на 12-то место на листата.
Во новогодишното рангирање на листата на 100 највредни брендови во светот прв пат се најде и тајванскиот производител на мобилни телефони „ХТЦ“, кој го зазема 98 -то место. „ХТЦ“ воедно е првата компанија од Тајван рангирана на оваа листа.
На листата домининираат брендови од САД, кои вкупно ги има 49, а потоа следуваат марките од Европа, кои се вкупно 38 на број. Меѓу европските брендови има фирми од Германија, Франција, Швајцарија, Италија, Велика Британија, Шведска, Холандија, Финска и Шпанија. Останатите марки потекнуваат од Јапонија, Јужна Кореа, Канада и по една од Мексико и Тајванд.
Рангирањето на брендовите се врши според сложена методологија во која се комбинираат претпоставките за влијанието на брендот во иднина и неговата улога во поттикнувањето на побарувачката. Покрај ова фимрите рангирани на листата мора да имаат јавно достапни финансиски податоци и најмалку една третитна од нивните приходи да потекнува од странство.
|
