06.10.2011, 13:04 Иванов: Поделбата на Косово може да го дестабилизира регионот
Македонија смета дека треба да продолжи дијалогот меѓу Белград и Приштина и покрај тоа што е отежнат од актуелната ситуација, вели претседателот на РМ во интервју за српската агенција Танјуг.
Иванов потенцира дека Македонија е подготвена и да посредува во изнаоѓањето решение, со оглед на добрите односи со сите соседи кои се за тоа подготвени.
- Македонија внимателно ја следи ситуацијата на Косово и односите меѓу Приштина и Белград. Свесни сме дека актуелниот развој на настаните ги отежнува разговорите, но сметам дека мора да породолжат по сите прашања по кои може да се очекува постигнување напредок, вели македонскиот претседател.
Тој потенцира дека Македонија е против евентуални разговори за поделба на Косово.
- Сметаме дека е тоа неодговорно размислување кое може подлабоко да ги дестабилизира целиот регион и да има последици кои ќе ги надминат сите потешкотии кои сега ги имаме, предупредува Иванов.
Според него, Македонија се залага за максимално почтивување на правата на граѓаните во сите држави во регионот, но и правото на граѓаните на самоопределување и почитување на комплексот етнички права.
Претседателот Иванов во интервјуто нагласува дека на Балканот ниту една држава не е етнички или верски хомогена и затоа сите држави треба да ги почитуваат овие принципи, вклучувајќи ги и Косово и Србија.
- Почитувањето на етничките права нуди можност да се совлада ризикот неодговорните политички фактори да ги злоупотребуваат разликите меѓу граѓаните. Ние тука сме подготвени да посредуваме, како политички, поаѓајќи од тоа дека Македонија одржува добри односи со систе соседи кои се за тоа подготвени, така и со размена на нашите искуства за градење модел на мултиетничка демократија, појаснува македонскиот претседатетел.
Иванов наведува дека „независноста на Косово е веќе признат факт за голем број држави од регионот и од Европа“, и оти и покрај тоа што ги разбира српските ставови, „мора да се направи обид да се најде начин како да се функционира до постигнување решение или барем односите дополнително да не се влошуваат“.
- Имаме успешен модел на помирување во ЕУ, каде државите се подеднакво долго, а често и многу подолго до балканските народи, имале искуство на непријателства и анимозитет. Тие земји ги надминале своите разлики благодарение на процесот на економско, а потоа и политичко поврзување, потсетува Иванов.
|
