04.10.2011, 23:08 Грција со стегнато срце, ќе задоцни со шестата рата
Дали ПАСОК пред можеше да замисли дека две години по изборната победа ќе биде заплеткан во демантирање сценарија за банкрот и отказ на Папандреу од премиерското столче?
Од нашиот дописник
Миркица Поповиќ
Атина - Единственото правило кое владее во Грција е дека не се знае што ќе донесе новиот ден. Грчкиот премиер Јогос Папандреу пред неколку месеци својот роденден го прослави со хаос од протести и неизвесноста околу шпекулации за предвремени избори и реконструкција на владата. Вчера на вториот роденден од доаѓање на власт на ПАСОК во Грција владееше сличен хаос, овој пат од објавите од странските медиуми за банкрот, отказ од Папандреу, барањата на Тројката и штрајковите на граѓаните.
Германскиот весник "Фајненшал Тајмс" објави вест дека блиски луѓе на Јоргос Папандреу тврдат дека премиерот во последните денови говорел се повеќе за откажување од премиерското столче и распишување на предвремени избори затоа што не можел веќе да се справува со притисокот од настаните поврзани со финансиската криза. Според германскиот весник Папандреу наводно исткнал дека се чувствува немоќен и дека Грциј�� веќе не одлучува за ништо сама. Од канцеларијата на грчкиот премиер веднаш побрзаа да ги демантираат овие информации, а како што пренесуваат медиумите близок соработник на Папандреу пренел порака до весникот дека информациите што ги добиваат се бесмислени и неточни.
Тензијата во Грција дополнително се зголеми откако министрите од Еврозоната во понеделникот не донесоа конечна одлука за кога ќе биде исплатена шесттата рата од кредитор за Грција. Парите од ратата ќе бидат готови некаде кон крајот на октомври, а ратата најверојатно ќе биде исплатена на почетокот на ноември. Како што истакна претседателот на Еврогрупата, Жан Клод Јункер исплаќањето на ратата во овој период нема да предизцика проблем со исплаќање на платите и пензиите во Грција. Јункер потенцираше дека воопшто не се ни дискутира ни размислува за излез на Грција од Еврозоната, ниту пак за нејзин банкрот. Пожарот околу прашањето дали државата ќе има пари за исплаќање пензии и плати го гасеше лично министерот за финансии Евагелос Венизелос, демантирајќи ги гласините за грчки банкрот и испразнета државна каса до крајот на октомври. Венизелос забележа дека имаат пари до средината на ноември, односно токму до периодот кога ќе биде исплатена новата рата, како и тоа дека Грција ќе си ги заврши сите обврски кон граѓаните и кон странските кредитори. "Главната работа не е исплаќањето на ратата, туку да се покаже дека имаме издржливо решение", потенцираше Венизелос, додавајќи дека државата мора да ги усвои и спроведе мерките за да ја подобри својата слика во меѓународните очи.
Утре Грција ќе биде парализирана од генерален штрајк на синдикатите, нема да работи никој од државниот сектор, проблеми ќе има на пристаништата, откажани се сите летови поради штрајк на контролорите на летови, а нема да се движат ниту возовите поради штрајк на вработените во железницата.
|
