Како Владата го привлече „Кромберг и Шуберт“ во Македонија?

Битолската опозиција ја поздрави германската инвестиција во ИЗ „Жабени“, но побара отчет за содржината на договорот со инвеститорот

Битола - Колку Владата го одврза ќесето за германскиот инвеститор „Кромберг и Шуберт“ да остане во Македонија и да вложи во ИЗ „Жабени“ крај Битола? Зошто целата постапка за привлекување на оваа инвестиција не е транспарентна, ниту за советниците од опозицијата во Битола, а уште помалку за граѓаните. Ова се само дел од политичките реакции по ставањето камен-темелник на првата инвестиција во битолската индустриска зона „Жабени“ на германскиот инвеститор „Кромберг и Шуберт“, кој ќе кради фабрика за производство на автомобилски кабли.

Битолските социјалдемократи поздравувајќи ја инвестицијата на германската фирма во Битола, сметаат дека постапките за привлекување инвеститори мора да бидат транспарентни и отворени, како кон странските, така и кон домашните инвеститори. Советниците на СДСМ од Битола поставија отворено прашања до градоначалникот Владимир Талески и до првиот човек на „Жабени“ што содржи таинствениот договор меѓу Владата и „Кромберг и Шуберт“, имајќи предвид дека Германците долго време одолжуваа со почетокот на инвестицијата.

Затоа социјалдемократите сметаат дека конкретно во овој случај затаила транспарентноста и побараа јавно одговор од премиерот Никола Груевски, какви услови содржи фамозниот договор.

„Кои се посебните поволности што ги доби ’Кромберг и Шуберт‘ од Владата на Македонија? Зошто исти такви поволности нема за преостанатите инвеститори во ИЗ ’Жабени‘ и дали токму тоа е причината што никој друг не ни размислува за почеток на градежни работи? Колку бројката од 2.500 вработени во ’Кромберг и Шуберт‘, ВМРО-ДПМНЕ ја има предимензионирано и ја користи во предизборни цели?“, праша Васко Ковачевски, претседател на општинската организација на СДСМ-Битола.

Според битолските вмровци, првпат во историјата на независна Македонија и тоа токму од Битола, опозициската СДСМ јавно признала дека мерките што владата на ВМРО-ДПМНЕ ги презема за привлекување странски инвестиции и обезбедување економски развој даваат конкретни резултати.

„Деновиве слушавме дека се против воведување сообраќаен ред во градот, против културата, против осовременувањето на клиничката болница и, да бидеме искрени, навистина сме изненадени што одеднаш не се против вработувањата кои ќе ги донесе ’Кромберг и Шуберт‘ во Индустриската зона ’Жабени‘. Затоа бараме да ни покажат каде се наоѓа барем една нивна капитална инвестиција во Битола?“, праша Благој Шаклевски, портпарол на ВМРО-ДПМНЕ-Битола.

Според вицепремиерот Владимир Пешевски, голем напор е да се привлече една ваква инвестиција како што е „Кромберг и Шуберт“. Во зоната „Жабени“, како што рече тој, за сите инвеститори важат исти правила.

„Внимаваме на рамномерниот економски регионален развој. Пристапот на Владата е балансиран кон сите компании, затоа оваа инвестиција не се случува во слободните економски зони, туку во индустриската зона. Оваа инвестиција ги има истите поволности кои важат за сите други инвеститори тука“, рече Пешевски.

Во зоната „Жабени“ плацеви за градење фабрики купиле дури 26 инвеститори. Според градоначалникот на Битола, Владимир Талески, дури 60 проценти од земјиштето за изградба на фабрики е веќе откупено. (А.Б.)