МВР снема картички за возачки дозволи

МВР ги троши последните резерви од бланко-картичките за издавање на нови биометриски возачки дозволи

Даниела Трпчевска

МВР ги троши последните резерви од бланко-картичките за издавање на нови биометриски возачки дозволи. Пратката со нови картички треба да пристигне во септември, само еден месец пред истекот на важноста на старите возачки дозволи. Законскиот рок во кој возачите ќе мора да имаат нови биометриски дозволи е 1 октомври, годинава.

Од МВР велат дека засега казни ќе нема. Летово од сообраќајни казни ќе куртулат и „новопечените“ возачи, кои само со пусулче ќе можат да докажат дека положиле за возачи, а во меѓувреме не успеале да извадат дозвола. Нема казни ниту за граѓаните на кои им истекол рокот за важност на старите дозволи. Причина за тоа е проблемот со недостигот на бланко картички, кој се појави уште на почетокот на летото.

„Во јуни заради зголемениот интерес на граѓаните имаше повеќе апликации, поради што се јави недостиг на бланко документи за возачки дозволи. Големата пратка се очекува да пристигне до септември. Во меѓувреме ние интервениравме и успеавме од Германија да добиеме помало количество брасци“, објаснува помошникот министер за информирање во МВР, Иво Котевски.

Свесни дека не ќе можат на сите заинтересирани граѓани да им излезат во пресрет, од МВР велат дека испратиле допис до сообраќајната полиција, во која ја информираат да стопираат казните за оние кои што тазе го положиле возачкиот испит, но и за граѓаните со возачки дозволи со изминат рок.

„Казни ова лето нема да пишуваме, за што се известени сите“, вели Котевски.

Приоритет при вадењето на возачките дозволи имаат професионални возачи, но и оние кои што често патуваат во странство.

Дел од граѓаните се жалат дека им истекна важноста на старите возачки дозволи, но дека не можат да извадат нови толку поради проблемот кој настанал со бланко картичките. Некои објаснуваат дека биле замолени дури во септември да аплицираат за нови дозволи.

„Веќе еден месец сум со стара дозвола. Страв ми е да помислам да запалам кола за да не ме сопре сообраќајна полиција оти ќе морам да плата висока казна. За нова дозвола изгледа ќе почекам, дури до септември, кога ќе има сигурно метеж и навалица пред истекот на рокот“, вели еден 26-годишен скопјанец.

Од Управните служби, пак, тврдат дека се обидуваат да им излезат во пресрет на сите граѓани и никој да не биде оштетен или вратен без да му биде заменета возачката дозвола.

„Со оглед на тоа дека истекува рокот за замена на старите документи, се обидуваме да не ги враќаме граѓаните. Го користиме сите резерви на бланко документи кои ги имаме и постапката не е стопирана. Се обидуваме да им излеземе во пресрет, пред се', на оние кои мора да патуваат во странство и на професионалните возачи. Дури и во саботите фотографираме за замена на старите возачки дозволи“, велат во управните служби на МВР.

Дневно се примаат по дури 500 апликации за возачки дозволи. Досега, според пресметките на МВР, се издадени над 500 илјади биометриски дозволи за возачите.

Сите оние коишто во изминатиот период не извадиле нова возачка дозвола која содржи биометриски елементи и наликува на кредитна картичка, ќе можат тоа да го направат до 1 октомври 2012 година. По овој период, старите документи престануваат да важат и не ќе можат да се користат. За вадење на нова возачка дозвола е потребно да се уплатат 600 денари. Доколку сакате да ја убрзате постапката, ќе треба да платите 1.150 денари за итен термин.

Обрасците за вадење на нови документи можат да се најдат во Управните служби на МВР или пак на интернет страницата на министерството.