(ФОТО) Србија ни подари копија од златна маска од Требениште



Копијата од златната маска треба да биде изложена во новиот Археолошки музеј во Скопје што би требало да биде отворен до крајот на годинава

ФОТО: Петр Стојановски

Музејска копија од една од двете златни маски од Требениште што се чуваат во Народниот музеј во Белград, денеска српскиот министер за култура Предраг Марковиќ и предаде на министерката за култура Елизабета Канчевска Милеска, гест што двајцата министри го посочија како продолжување на добрите односи меѓу двете земји.

Копијата од златната маска која е откриена во 30 тите години на минатиот век во познатата Требенишка некропола во близина на Охрид, треба да биде изложена во новиот Археолошки музеј во Скопје што би требало да биде отворен до крајот на годинава.

Надвор од Македонија има четири маски од Требениште, две се наоѓаат во Народниот музеј во Белград, а две во Софискиот археолошки музеј. Копијата на златната маска од Белград доаѓа по претходно барање од Министерството за култура, кое преку Управата за заштита на културното наследство, било упатено до српското министерство за култура.

"Овие артефакти, кои се определуваат како култни предмети, се поврзуваат со верувањата и ритуалите кои се правеле за време на погребувањата", рече меѓудругото министерката за култура Елизабета Канчевска Милеска, осврнувајќи се на големото значење на златните маски кои во македонската наука спаѓаат меѓу највредните откриени артефакти.

Според министерот за култура, Предраг Марковиќ, музејската копија на златната маска е подарок од Србија за македонскиот народ и македонската држава.

Тој при предавањето на подарокот, го нагласи големото значење на локалитетот Требениште како простор каде меѓу 6-5 век пр.н.ера постоела развиена култура, за што според него, и сведочи високата уметничка изработка на маската.

Првите истражувања на археолошкиот локалитет Требениште се започнати во 1918 година, кога случајно е откриен првиот гроб од истоимената некропола од страна на бугарска војска, по што богатиот археолошки наод подоцна бил префрлен во Софискиот археолошки музеј.

Од 1930 до 1954 година, испитувањата ги продолжил Никола Вулиќ, кога и била откриена златната маска и однесена во Белград. Во педесеттите години на минатиот век, истражувале В.Лахтов и Ј.Кастелиц, а во 1972 година истражувањата се вршени под раководство на археологот од Охрид, Владо Маленко.

Со децениските археолошки истражувања откриени се 56 гробни констр��кции, а првите откриени гробови биле исклучително богати поради што и биле нарекувани "кнежевски гробови". Во нив се пронајдени златните маски, сандали, нараквици златен и сребрен накит, бронзени кратери, сребрени пехари, бронзени шлемови и др. Освен во Белград и Софија, дел од овие артефакти се наоѓаат и во Заводот и Музеј во Охрид. (К.Б.)