Мое ќоше

Прометеј во гаќи, власта гола

Ерол Ризаов

Бидете без гајле, се' е под контрола во последниот темен вилает на Балканот

Ниту еден критичар не успеа толку хиперреално да ја наслика македонската споменикоманија како што тоа го направи самиот мецена на нашата нова преродбеничка уметност. Комисијата за цензура, чуварот на сенародниот морал, го облече во бронзени гаќи античкиот митолошки јунак Прометеј да не му се гледа машкоста. Голиот чувар на вечниот оган го онеспокојувал народот. Срамота било, со својот орган, да предизвикува јавно соблазнување, или гадење, во зависност од бујноста на фантазијата.

Прометеј го облече богобојазната власт, но остана целосно разголена во својот примитивизам и тежок провинционализам кој ја заплиснува Македонија. Не како нов бран, туку како голем „талас“, поголем од цунами и како вековна заостанатост и анахронизам кој гротескно го отсликува последниот темен вилает на Балканот. Со овој крајно лицимерен чин станува сосема јасно колку многу знаат творците на новата македонска ренесанса, барок, рококо и хуманизам за уметноста. Всушност покажаа дека ништо не знаат и тоа ама баш ништо не им ни значи. Важно е само да се додворат на јавноста со тежок популизам како заштитници на лажниот морал.

Не дека македонските пуританци не го прошетале светот, па не чуле и не ги виделе најголемите светски ремек-дела и споменици кои сакаат да ги копираат нудејќи ни со лоши плагијати пославно минато да се чувствуваме подобро, туку нивните поданици потонати во мизерија и беда, во секојдневната битка да се преживее, разбирливо, не можат гладни и да ја видат сиромаштијата на духот и заробеништвото во кое сме длабоко западнати како во средните векови на инквизицијата.

Оковани сме во минати времиња каде што ловот на вештерки и јавниот линч добиваат легитимно право на граѓанство како херојски чин во заштита на нацијата, идентитетот и името на државата од клетите душмани и предавници. Повторно осамнаа по весниците дуплите страници на македонски непријатели. Овој пат тоа се „Tатковци и деца“. Не од славниот Тургењев, туку од преродбеникот Груевски. Продолжува срамната сапуница на ВМРО-ДПМНЕ објавувајќи фотографии на македонски граѓани и нивните деца чиј грев е што се членови или симпатизери на политички партии, или некогаш биле тоа, а има и такви кои никогаш не биле во ниту една партија. Нивниот грев е да се биде син или ќерка, брат или сестра, или пак татко и мајка на деца кои критички гледаат на чекорите на Владата. Големо злосторство е во Македонија да се биде дете на симпатизер на политичка партија која шест години е во опозиција. Нивните слики со народни пари се печатат по весниците како да се болни од лепра.

Јавниот обвинител вообичаено молчи. Тој во тоа не гледа загрозување на човековите слободи и права.

Пред само еден месец осамнаа други едни потерници со фотографии на луѓе чии биографии секоја одделно се побогати отколку на целото горско началство на ВМРО-ДПМН��. За оваа срамна и понижувачка пресметка со политичките противници, тогаш јавно го прашав лидерот на ВМРО-ДПМНЕ, Никола Груевски, како се чувствува кога ги гледа овие катил ферамани на кои недостига само WANTED.

Одговорот стаса по неполн месец. Не само што Груевски уживал да ги гледа сликите на своите политички противници обесени по весниците, туку тој лично ја охрабрува револуционерната борба на партијата да се сотре до последен кој не е со нив. Според историската максима на големите демократи и патриоти: кој не е со нас е против нас.

За тоа не' пофали целиот свет, дури и американскиот Стејт департмент. Во својот годишен извештај за состојбата со човековите права како најголем проблем во Македонија е нотирано што владата не успеала сосема да го спроведе владеењето на правото, што се рефлектира со нејзиното мешање во правосудниот систем и во медиумите, во селективното гонење на политичките противници и значајното ниво на корупција. Тензиите меѓу Албанците и Македонците предизвикуваат загриженост, а исто така и дискриминацијата на Ромите и другите верски и етнички заедници, вели Стејт департментот. Па што, кој ги шиша. Нека си ги гледаат тие своите злоупотреби и нивното загрозување на демократијата.

За нас важно е што вели Никола Груевски: „Тоа се стандардни обични критики како и секоја година“. Многу утешително.

Бидете без гајле, се' е под контрола во земјата безнадежија. И власта и опозицијата, и судството и медиумите, апсолутно се', дури и алатот од бронза на Прометеј.