Агрокомбинатот „Џумајлија“ во претстечајна постапка

Дали за Комбинатот ќе биде воведен и стечај ќе се знае на 4 јуни

Иван Бојаџиски


Штип – Над „Џумајлија“ од Лозово, вториот по големина агрокомбинат во државата, деновиве е воведена претстечајна постапка. Вакво решение донесе Основниот суд во Штип, кој за привремен стечаен управник ја назначи Владица Ивановска од Свети Николе. Дали над Комбинатот ќе биде воведен и стечај, што е многу извесно дека ќе се случи, ќе се знае на 4 јуни кога во штипскиот суд ќе се одржи првото рочиште.

„Во текот на претходната стечајна постапка треба да се испитаат условите за евентуално отворање на стечај. Решението ќе зависи од тоа дали имотот на агрокомбинатот е доволен за да се намират трошоците по стечајната постапка“, вели Ивановска.

Според привремената стечајна управничка, најважно во овој дел од процесот е тоа што со ова решение на судот се изречени и повеќе мерки за обезбедување на имотот од натамошна присилна наплата на побарувањата со одземање на движниот и недвижниот имот на „Џумајлија“. Ваков процес на наплата се случуваше во изминатите месеци, кога преку извршители од Свети Николе и од Штип некои од доверителите се обидоа да дојдат до своите пари. Таквиот обид крена на нозе близу 500 лозари од Тиквешијата и Овчеполието, кои, кон крајот на јануари годинава, протестираа пред канцеларијата на еден од светиниколските извршители. Лозарите бараа ист третман за сите доверители, при што рекоа дека комбинатот им должи два милиони евра на име неисплатено грозје за последните две години. Постапката за присилна наплата кај извршителот беше сопрена, но дали лозарите ги добија своите пари никогаш потоа не беа дадени никакви информации.

„На првото рочиште во судот ќе се изјаснуваат сите странки за поведување стечајна постапка. Во ова меѓувреме државата ја раскина концесијата со АК „Џумајлија“ за 5.000 хектари кои на комбинатот му беа дадени да ги работи. Од овие површини околу 400 хектари се под лозови насади, а ние обезбедивме тие да се работат бидејќи се во добра кондиција. Се работи и на сто хектари под луцерка. За работа на нивите беше упатен повик до сите 180 работници на комбинатот, а добар дел од нив се одзваа и тие за својот ангажман ќе бидат исплатени“, вели Владица Ивановска.

Пропаста на големиот агрокомбинат, кој беше купен од светиниколчанецот Зоран Даневски, а кој е познат и како поранешен директор на Ветеринарната државна управа, беше најавена на почетокот од годинава кога Основното јавно обвинителство во Свети Николе поднесе кривична пријава против него поради злоупотреба на службената положба и овластувања. Според пријавата, Даневски ја оштетил државата за сума од 1,5 милион евра.

Имено, во текот на 2010 година, со договор меѓу Дирекцијата за стоковни резерви и АК „Џумајлија“, во силосите на комбинатот биле складирани и оставени на чување 4,4 милиони килограми меркантилна пченица и еден милион килограми јачмен. Кога во текот на годината луѓе од Дирекцијата за стокови резерви извршиле инспекција на состојбата со државните резерви, во магацините на комбинатот недостигале близу 2,2 милиони килограми пченица, поради што против Зоран Даневски била поднесена кривична пријава. Бидејќи тој процес се одвивал на стартот од новата жетва, Даневски бргу, од новата реколта го надоместува кусокот, и поради тоа по кривичната пријава не се постапувало. Два месеци по првата инспекција во комбинатот повторно дошле луѓе од Дирекцијата за стоковни резерви. Тогаш било утврдено дека од вкупните резерви во магацините не останало ниту зрно.

Откако ОЈБ во Свети Николе поднесе кривична пријава против Зоран Даневски, и притоа носи привремена мерка на забрана за располагање со имотот на АК „Џумајлија“, но и со имотот на останатите пет негови тр��овски друштва, а Основниот суд донесува решение за спроведување истрага против него, првиот човек на агрокомбинатот бега од Македонија. Бидејќи судот не може да го најде во државата, судот распишува меѓународна потерница. Зоран Даневски неколку месеци успешно се крие по светот, а шпекулациите одеа во разни насоки. Дека е во Америка и дека таму си купил американско државјанство, дека е во некоја латино-американска држава до тоа дека е во соседството, во Бугарија. Пред извесно време во нашите медиуми проструи веста дека тој бил уапсен во Бугарија, но потоа немаше никаква информација за тоа дали Македонија побарала тој да биде вратен во државата за пред судот да ја докажува својата (не)вина.