28.05.2012, 10:31 По поразот, Тадиќ се готви за премиер
БЕЛГРАД - Борис Тадиќ, одморен од поразот на претседателските избори пред една недела, вчера се претстави како кандидат на неговата партија за помоќната премиерска функција во државата, на чело на обновената централно-левичарска коалиција. „На прашањето дали сум подготвен да ја преземам улогата на премиер, одговорив со ’да‘ под услов целите, принципите и планот за работа што им ги презентирав на нашите коалициски партнери да бидат прифатени“, изјави Тадиќ пред новинарите по тричасовниот состанок на раководството на Демократската партија (ДП).
Тој најави дека за парламентарното мнозинство прво ќе разговара со коалицијата СПС-ПУПС-ЈС и дека верува оти со нив ќе постигне договор за парламентарно мнозинство. Тадиќ нагласи дека никогаш не доаѓала предвид, ниту пак ќе дојде предвид каква било коалиција со СНП. Според неговите зборови, за третиот партнер во владата ДП ќе разговара со првите луѓе на коалицијата СПС-ПУПС-ЈС.
Тадиќ нагласи дека идната влада треба да биде вооружена со цели и вредности како и со план кој е реален и остварлив. Тој истакна дека ќе дојде време и за анализа на резултатот на изборите, како и за анализа на одговорноста. „Се соочуваме со големи проблеми, но верувам дека доаѓаат подобри денови за Србија“, порача Тадиќ по состанокот на врвот на ДП.
На коментар на новинарите дека „сите го молат да биде премиер и дека молбата наскоро ќе стигне и до претседателот на Републиката“, Тадиќ изјави дека Томислав Николиќ тоа веќе на некој начин го направил изјавувајќи дека лидерот на ДП треба да одлучи дали сака да биде премиер.
„Нешто не гледам дека во моментов сите се туркаат околу местото претседател на влада, додека само пред неколку недели тоа беше атрактивно место. Што да ви кажам, се менува политичката ситуација во Србија, веројатно тоа сега е едно жешко место, но боже мој, беше такво и претседателското место во изминативе осум години, па успеавме да ги одбраниме интересите на државата“, изјави Тадиќ.
На прашањето зошто, сепак, се одлучил да прифати да биде кандидат за премиер откако во изборната ноќ на 20 мај изјави дека сигурно нема да биде, Тадиќ одговори: „го кажав тоа што го мислев и чувствував“.
„Ако ме прашате дали по притисокот и барањата од партијата сум го променил мислењето, ќе ви кажам дека таа ноќ го кажав тоа што го мислев и чувствував и беше повеќе од очигледно дека го зборувам токму тоа што е во мене. Немав никаков резервен план во тој момент и бев целосно ориентиран на претседателските избори“, објасни Тадиќ. (Б92)
|
