28.05.2012, 15:14 Хесједал ги освои Апенините
Канада го доби својот прв победник на Џиро ди Италија
Со пресврт во последната етапа, Рајдер Хесједал триумфира на Џиро ди Италија како прв Канаѓанец кому му успеало тоа во една од најпрестижните велосипедски трки во светот. Во решавачката 21. етапа, која се возеше на хронометар во Милано, Хесједал го освои шестото место и ја надополни разликата од 31 секунда што по Апенините ја имаше во однос на дотогашниот лидер, Шпанецот Хоаким Родригез од Катјуша, кој заврши 26.. Велосипедистот на Гармин-Баракуда оствари вкупно време од 91:39,02 часа, подобро за 16 секунди од тоа на второпласираниот Родригез во генералниот пласман.
„Ова е нешто неверојатно. Не можам да поверувам дека ми се случи вакво нешто. Ова е остварување на сонот“, изјави по трката Хесједал. „Немаше да успеам без силната поддршка од мојот тим. Сепак, на крајот останав свеж и со најмногу сили во однос на моите конкуренти и ја искористив шансата“.
Утешна награда за Родригез ќе биде црвената маичка наменета за велосипедистот со најмногу бодови. Шпанецот освои 139, еден повеќе од Британецот Марк Кевендиш од Скај, а Хесједал во оваа конкуренција е трет со 113 бода.
Трофејот за најдобар искачувач му припадна на Италијанецот Матео Работини, кој собра 84 бода во планинските етапи, а најдобар млад возач е Колумбиецот Ригоберто Уран, кој забележа вкупно време од 91:44,59 ч.
По последната етапа причини за радост имаше и Италијанецот Марко Пиноти, кој ја облече сината маичка благодарение на најдобриот пласман на хронометарската трка со време од 33:06 ч. Веднаш зад него се најде Велшанецот Џерант Томас со 39 секунди заостанување, а трет беше Џеси Серџент.
Конечен пласман: Рајдер Хесједал (Канада/Гармин) 91:39,02 ч., Хоаким Родригез (Шпанија/Катјуша) +16 сек., Томас де Гент (Белгија/Вакансоле)+1:39 мин., Микеле Скарпони (Италија/Лампре) +2:05 мин., Иван Басо (Италија/Ликвигас) +3:44 мин. итн. (Љ.В.)
|
