Дел Боске го пречкрта Лопез

Шпанскиот селектор за стрелецот против Србија се изјасни дека „не може дебитант да оди на ЕП“

Шпанскиот селектор Висенте дел Боске го соопшти репрезентативниот список за Европското првенство во Полска и во Украина. Шпекулациите околу тоа кои напаѓачи ќе добијат амин се претворија во жестоки реакции откако од офанзивниот арсенал на „фуријата“ официјално отпаднаа Роберто Солдадо и Адријан Лопез. Откако стана јасно дека Давид Вилја нема да заздрави навреме, настапот на Љоренте и на Торес се наметнуваше како логична претпоставка. Врева кренаа преостанатите два избора на Дел Боске, особено Алваро Негредо од Севилја. Шпанските медиуми прашуваат зошто тој, а не Лопез, кој постигна гол и врз него беше направен пенал во дебито за репрезентацијата на пријателскиот меч со Србија (2:0) во саботата.

„За мене е неприфатливо кој било да оди на големо натпреварување веднаш по дебитантскиот настап за репрезентацијата. Адријан одигра брилијантно со Србија и ќе го следиме и понатаму“, беше објаснувањето на Дел Боске за 24-годишниот напаѓач на Атлетико Мадрид.

Селекторот го објасни и изборот на Негредо пред Солдадо, бидејќи шпицот на Валенсија со 17 гола беше најефикасниот Шпанец во Примера сезонава. Згора на тоа, имаше уште осум гола во Копа дел Реј и во Лигата на шампионите.

„Станува збор за двајца исклучителни, но многу различни играчи. Едниот е побрз, а другиот работи повеќе за екипата. Давид Вилја е незаменлив, но моравме да ја бараме најсоодветната солуција која ќе го надомести неговото отсуство“, рече Дел Боске. Тој објасни и дека Педро е повикан бидејќи ќе биде многу покорисен во ширењето на играта по страничните позиции.

Шпанија е актуелен европски и светски првак, а титулата во Полска и во Украина ќе ја брани од групата Ц, каде што ќе игра против Италија, со Хрватска и со Република Ирска.

Голмани: Касилјас, Валдес, Реина. Одбрана: Арбелоа, Хуанфран, Рамос, Пике, Албиол, Алба, Мартинез. Среден ред: Бускетс, Алонсо, Чави, Иниеста, Казорла, Мата, Силва, Фабрегас, Навас. Напад: Торес, Љоренте, Педро, Негредо. (В.А.)