Собраниски молк за ревизорските извештаи

Парламентарното мнозинство го отфрли предлогот на пратеникот Зекири да се формира Комисија за надзор на јавните финансии

Ревизорските извештаи кои изобилуваат со сочни „пикантерии“ за тоа како министерствата и другите буџетски корисници ги трошат народните пари, нема да бидат под лупа на пратениците. Изет Зекири од НДП, поддржан и од другите пратеници од опозицијата, предложи да се формира Комисија за надзор на јавните финансии, која би ги разгледувала овие извештаи. Но, народните избраници од власта неодамна без посебно образложение ја отфрлија таа идеја. Пратеникот Зекири ни изјави дека неговата предлог-одлука пред неколку дена била разгледувана на собраниска седница по скратена постапка, но не добила „преодна оценка“ од парламентарното мнозинство.

„Предлогот го подготвив бидејќи никој во парламентот не ги разгледува ревизорските извештаи, а во сите нив се констатирани многу пропусти и недоследности во трошењето на народните пари. Таму има многу работа за Обвинителот, но во Собранието не се разгледуваат“, вели Зекири.

Конкретно, овој пратеник предложи да се дополни Одлуката за основање постојани работни тела на Собранието, каде што би се додала и Комисија за надзор на јавните финансии. Таа би имала претседател, 12 члена и нивни заменици, а претседателот би се избирал на предлог на пратеничките групи од партиите во опозиција.

Комисијата би ги разгледувала Годишниот извештај за извршените ревизии од Државниот завод за ревизија, Извештајот за работата на ДЗР, ревизорскиот извештај за Буџетот, конечните ревизорски извештаи, а би вршела и надзор врз спроведување на законите кои директно ја регулираат областа на ревизијата и јавната внатрешна финансиска контрола. Исто така, Комисијата би организирала јавни расправи за извештаите, на кои би се повикувале и претставниците од буџетските корисници, тие да поднесат извештај за содржината на ревизорскиот извештај. Во случај на големи неправилности утврдени во извештаите, Комисијата би подготвувала препораки и би ги поднесувала до Собранието, а од институциите би барала информации за прогресот што е постигнат во примената на овие препораки.

Во образложението на предлогот се вели дека за да се овозможи напредок на контролната улога на Собранието на трошењето на јавните средства од буџетските корисници, Собранието е должно да ги разгледува ревизорските извештаи и по нив да усвојува заклучоци.

Со формирањето на комисијата би се зајакнала и соработката меѓу ДЗР и Собранието, што беше и забелешка во Извештајот на ЕК за нашиот напредок за минатата година. Поточно, во извештајот стои дека „годишната програма на ДЗР за 2011 предвидува интензивна соработка со Собранието. Сепак, досега не е воспоставен формален механизам за собраниска контрола на извештаите од ДЗР“, се наведуваше во Извештајот.

Според Зекири, со ова тело ќе се подобреше и соработката од аспект на навремено доставување и разгледување на ревизорските извештаи, со цел да се спречат натамошните незаконитости во користењето на јавните финансиски средства и навремено преземање мерки на одговорност кон раководителите на субјектите што ги пречекоруваат овластувањата. Исто така, граѓаните поефикасно ќе беа информирани за начинот на трошењето на јавните средства.

Но, оваа можност не им се виде интересна на пратениците од владејачките партии и тие гласаа „против“ предлогот. (Н.Н.Ф.)