Молк за истрагата за Смилковци

Судот се' уште чека еден куп вештачења за случајот, а полицијата нема нови сознанија за двајцата осомничени убијци кои се во бегство

Љубиша Станковиќ

Затишје во истрагата за петкратното убиство во близина на селото Смилковци. Истекува и вториот месец од истражните дејства за масакрот на четирите момчиња и рибарот кој се случи на 12 минатиот месец во непосредна близина на Железарското Езеро. Судската истрага е во делумен застој поради тоа што и се чекаат наодите на експертите, откако со денот на отворањето на кривичната истрага издале еден куп наредби за постапување. Од полицијата, пак, се' уште немаат сознанија каде се двајцата избегани, осомничени за петкратното убиство, за кои постоеја сомневања дека се на Косово. И покрај потерницата која беше распишана за нив, одговор од косовските власти се' уште не пристигнал, дали се лоцирани бегалците од Смилковци.

Судот во меѓувреме чека на еден куп вештачења кои биле наложени да се извршат за случајот. „Се работат неколку вештачења, а потоа ќе треба да се направи нивна споредба. И ние чекаме на вештите наоди и мислења на балистичарите, а ги очекуваме и медицинските протоколи од Институтот за судска медицина.

Откако сите вешти наоди ќе бидат изработени и кога ќе ни бидат вратени, истрагата за овој случај ќе продолжи“, вели в.д. претседателот на скопскиот Кривичен суд, судијата Марјан Колишевски. Тој појаснува дека став на Кривичниот суд е дека се' што е ново и се однесува на случајот „Монструм“ ќе биде објавено во јавноста преку официјално соопштение.

Во недостиг од поконкретни информации за досегашниот тек на кривичната истрага, која се води за петтемина осомничени за бруталниот масакр кај скопското село Смилковци, неофицијално се дознава дека истрагата се' уште не ги прикажала доказите кои биле обезбедени со примената на посебни истражни мерки. Според истите сознанија, тројцата притворени и натаму остануваат на она што веќе го кажале. Двајца од нив негирале каква и да е инволвираност во трагичниот настан кој се случи на Велики четврток, а третиот го користел правото да се брани со молчење.

Информациите до кои дојдовме упатуваат на тоа дека лицето кое најпрво имаше статус на заштитен сведок, а потоа беше обвинето, во два наврати дало свое видување на крвавиот настан, но дека и двата искази му биле речиси идентични.

Она што засега е извесно е тоа дека за масакрот кај Железарското Езеро, односно за кривично дело тероризам се сомничат Агим Исмаиловиќ (33) и недостапните Африм Исмаиловиќ (32) и Алил Демири (27), а дека нивни помагачи се Фејзи Азири(54) и Рамиз Сејди (24).

Полициската истрага излезе со тврдење дека инволвираните во настанот од 12 минатиот месец настапиле од позиција на радикален ислам, но се' уште треба да се бара мотивот за бруталното убиство на младите Кире Тричковски, Александар Наќевски, Филип Славковски, Цветанчо Ацевски и 45-годишниот Борче Стефановски, од скопското село Црешево.

Притворањето на осомничените иницираше серија протести кај младите од албанска националност, а протести имаше и од другата страна како одговор на настанот кој се одигра кај село Смилковци.

Опасност од нови напади

Ал Каеда имала три кампа во Македонија, а членови на партии од земјава се обучувале во Техеран, тврди Бабамовски

Македонија се наоѓа на крстопатот на сите видови радикализам во кои учествуваат и разузнавачките служби, кои користејќи одредени методи на радикализам и фундаментализам, настојуваат да ги заштитат сопствените интереси. Македонија се проценува како една од најслабите алки на Балканот, поради што „црната интернационала“ се организира и се подготвува. Моите процени се дека ќе има уште пожестоки акции и активности изведени на терористички план, ова се размислувањата на пензионираниот професор по безбедност, Иван Бабамовски, кој вчера присуствуваше на семинарот посветен на борбата против насилниот екстремизам, кој се одржува во Скопје. На него воени и полициски експерти, професори и претставници на дипломатскиот кор разменуваа сознанија и информации за состојбата со насилниот екстремизам, кој претставува се' поголема закана во светот.

Бабамовски смета дека по Смилковци, може да се очекуваат уште неколку такви акции, за кои би бил бил пресреќен доколку не се реализираат. „Тогаш нема да се срамам пред јавно��та да кажам дека сум погрешил во моите процени“, вели Бабамовски, кој повикувајќи се на своето долгогодишно искуство, нема дилема дека тоа што се случи на Железарското Езеро е терористички акт со јасна порака да се внесе страв кај населението и да им се создаде чувство дека Македонија не е безбедна земја за живеење.

„Додека криминалците вешто се кријат, терористите сакаат нивните акции да добијат одзив во јавноста. Во Смилковци се оставија такви жестоки траги како порака до граѓаните за да им се внесе страв дека државата не им ја гарантира безбедноста. Тоа покажува дека состојбата не е добра“, вели професорот во пензија.  

Според него, нема тероризам без криминал, без финансии и без валкани пари. Тероризмот мора да се гледа во корелација со организираниот криминал.

„Го сменивме директорот на Агенцијата за борба против организираниот криминал само затоа што најави една невидена активност и спрега на тероризмот, на радикализмот, особено со оној исламски предзнак и парите кои доаѓаат во Македонија. На тој начин нема да дадеме придонес во антитерористичката коалиција која јас лично ја поддржувам“ критикува Бабамовски.

Тој изнесува сознанија дека во земјава постоеле три кампа за обука на припадници на Ал Каеда. „Од една етничка партија 25 активисти беа на обука во Техеран во камп во кој се обучуваат  терористи. Еден од лидерите се обучуваше за духовен пропагатор и духовен  водач на структури кои исто така имаат допирни точки со тероризмот“, тврди професорот во пензија. (Д.Т.)