„Пелистер“ го почна походот од Охрид

Kоалицијата на ВМРО-НП, ЛДП, Достоинство и ОМ на првиот митинг почна да ги одбројува деновите на оваа власт

Веле Митаноски

Охрид - Лидерите на ВМРО-Народна партија, на Либерално-демократска партија, на Достоинство и потпретседателот на Обединети за Македонија, од скопската кафеана „Пелистер“ каде пред еден месец прв пат заеднички пиеја кафе, отидоа во Охрид од каде, како што велат ја почнуваат серијата митинзи.

Под мотото „За демократска Македонија“ завчеравечер во Охрид „четворната коалиција“, која тие ја дефинираат како Вистинска, а не како Трета опција, го почна својот политички поход. Идеолошките разлики не ги спречија првите луѓе на четирите вонпарламентарни партии заеднички да ја стартуваат битката за претстојните локални избори.

„Нас не' обединија неколку точки, а тоа се деблокада кон НАТО и ЕУ, излегување од економската апатија и борбата за демократија“ рече лидерот на ВМРО-НП, Љупчо Георгиевски според кој, коалицијата на почетокот била чудна појава, но веќе станала сила од која ќе зависи идната власт во државата.

„Имаме најниски плати во Европа и најголема невработеност. Се наоѓаме пред демократска катаклизма, но, на режимот тоа не му пречи. Во кампањата ’Купи куќа-купи стан‘ даде повеќе пари за рекламни спотови отколку што ја помогна акцијата. Во ’Осмели се‘ даде 4 пати повеќе за реклами, а дури 10 пати повеќе од средствата за студентите, како стипендии за странство. Кога јас бев премиер (освен кампањите на министерот за финансии Груевски), не дадовме ниту една марка за реклами, додека сега тој износ достигна 90 милиони евра“, обвини Георгиевски и ги повика граѓаните да излезат, како што рече, од хипнозата во која ги успиваат владините медиуми.

Андреј Жерновски од ЛДП рече дека засега не знае дали до изборите ќе останат само како „четворна коалиција“, или ќе се обединат пошироко. „Ние сме различни по идеологија, но сме сите исти кога е во прашање Македонија на која режимот и' подготвува иднина на восочни фигури. Истиот режим кој само во последните 6 месеци ја задолжи земјата за нова милијарда евра, додека сто милиони троши за реклами. Од овде започнува одбројувањето на деновите на власта на Груевски и фамилијата“, порача Жерновски.

Стојанче Ангелов од Достоинство, исто така најави поход за рушење на „ненародниот, расипнички и корумпиран режим на фамилијата“. „Во 2001 година ја бранев Македонија од наследниците на Балистите. Лани се борев со пиратите во Индискиот океан. Сега сме во нова битка со лажните патриоти кои од Македонија направија земја на политички затвореници, како братот Љубе. Вие го создадовте, ваша е должноста и да го симнете, заедно со нас“, му се обрати Ангелов на Љупчо Георгиевски.

На собирот говореше и потпретседателот на Обединети за Македонија, Марјан Огненовски, кој судбината на својот партиски лидер ја спореди со онаа на Јулија Тимошенко, а од претседателот Ѓорге Иванов побара да ги искористи ингеренциите и да го ослободи Љубе Бошкоски.