31.05.2012, 12:56 Сарачини: Не очекував да нема понуди за купување на ОХИС
„Ќе работиме во насока на изнаоѓање стратешки партнер или пак да се договориме да се смени моделот на продажба и да најдеме некој друг модел кој на крајот ќе успее“.
Ова го изјави министерот за економија Ваљон Сарачини во одговор на прашање за причините за пропаднатиот тендер за продажба на ОХИС пред почетокот на „Форумот за развој на мали хидроцентрали, регулатива, финансирање и инвестициски предизвици“.
- Не очекував дека нема да имаме понуди на тендерот за продажба на ОХИС, бидејќи како Влада направивме доста за да подготвиме тендерска документација која ќе биде во согласност со синдикатот, со вработените и со инвеститорите. Имавме контакти со потенцијалните инвеститори до пред десет дена, но дали ги предомислија бројот на вработените, штрајкот или оставката на директорот на само недела пред истекот на крајниот рок за доставување понуди на тендерот или, пак, се работи за некоја друга причина, сепак крајниот резултат е познат дека немаме ниту една понуда, изјави Сарачини.
Се надевам, нагласи, дека нема да ги оставиме на цедило вработените.
- Побарав состанок со претставници од синдикатот, поточно со Пеце Ристевски и се договоривме до понеделник да се видиме и заедно да работиме за да го решиме проблемот, истакна Сарачини.
На некоја од наредните седници на Владата, додаде, ќе се назначи нов директор на ОХИС.
Во врска со исплатата на заостанатите плати за вработените во ОХИС, министерот за економија рече дека кажал оти декемвриската плата ќе биде исплатена до 15 мај, платата за јануари до 10 јуни, останатите плати во износ од 15 милиони денари ќе бидат исплатени до 30 јуни по ребалансот на Буџетот и ќе бидат обезбедени од страна на Владата.
- Тие 15 милиони денари ќе бидат една, две или три плати во зависност од тоа колку луѓе работеле во тој период, појасни Сарачини.
Вчера истече крајниот рок за доставување понуди за купување на ОХИС по почетна цена од 14.000 евра. Иако првично беше покажан интерес од две бугарски и една македонска компанија никој не достави понуда за купување.
Пешевски: Потребно е да се направи приспособување на моделот за приватизација на ОХИС
Продажбата на ОХИС, откако пропадна последниот тендер на кој не беше доставена ниту една понуда, повторно ќе биде разгледувана на некоја седница на Економскиот совет.
Вицепремиерот за економски прашања Владимир Пешевски, одговарајќи на новинарски прашања по отворањето на првото Бизнис екселент шоу, рече дека Владата очекувала на последниот тендер да добие барем една понуда. Но, додава, сепак секогаш кога Владата настојува се чини да задржи што поголем број или сите вработени во друшвата кои се предмет на приватизација тоа не наидува на особено голем прием кај инвеститорите. Ќе биде потребно да се направи одредено приспособување на моделот, но интенцијата да се најде стратешки партнер и за ОХИС, но и за другите претпријатија останува и натаму, изјави Пешевски.
Тој потенцира дека сега не се размислува за отпуштање вработени од компанијата и оти кога ќе биде развиен новиот модел ќе биде информирана јавноста.
Тендерот за продажба на ОХИС заврши вчера и до крајниот рок не беше доставена ниту една појава, иако четири компании подигнаа тендерска документација.
Пешевски, по последните објавени податоци за падот на индустриското производство, не смета дека Македонија ќе влезе во рецесија.
|
