30.05.2012, 13:04 Чарлс Тејлор осуден на 50 години затвор
Специјалниот суд за Сиера Леоне денеска го осуди поранешниот претседател на Либерија, Чарлс Тејлор на 50 години затвор.
Тејлор во април беше прогласен за виновен за воени злосторства и злосторства против човештвото по сите 11 точки од обвинението, вклучително и помагање и поттикнување на бунтовниците во Сиера Леон, кои убија и осакатија околу половина милион луѓе за време на граѓанската војна (1992-2002).
Тејлор (64) е обвинет дека го помагал Револуционерниот обединет фронт (УРФ), чии припадници со дијаманти му плаќаа за оружјето што му го доставуваше.
Специјалниот суд за Сиера Леоне го обвини и за поттикнување на геноцид во земјата, за убиства, за силувања, за формирање на единици од деца од освоените села, како и за сексуално ропство за време на граѓанската војна.
Судот смета дека Тејлор знаел за бруталните силувања, убиства, сакатења на цивилите и оти ништо не презел да ги спречи злосторствата, туку напротив ги вооружувал и финансирал припадниците на УРФ.
Тејлор профитирал во трговијата со така наречените крвави дијаманти, кои ги користел за понатамошно финансирање на судирот во Сиера Леоне.
Судењето од Специјалниот суд за Сиера Леоне беше преместено во Холандијам поради страв од судири и нестабилност во односите меѓу Сиера Леоне и соседна Либерија.
Тејлор е во притвор од 2006 година и е прв шеф на една африканска држава осуден пред меѓународен суд за воени злосторства.
Обвинителството бараше казна од 80 години, додека адвокатите на Тејлор побараа казна која би му „оставила надеж“ дека ќе излезе пред да умре.
Одбраната и обвинителството имаат две недели рок за поднесување на жалба на пресудата.
Судот претходно соопшти дека Тејлор казната ќе ја отслужува во британски затвор.
Тејлор од 1997 до 2003 година беше претседател на Либерија.
|
