Георгиевски подготвен да коалицира со СДСМ

На повидок љубов меѓу коалицијата „Пелистер“ и СДСМ: Создадени се сите услови за соработка, порачаа од ЛДП

Горан Адамовски

Создадени се сите предуслови за предизборна соработка меѓу СДСМ и коалицијата „Пелистер“. Претседателот на најголемата опозициска партија, Бранко Црвенковски, во последното интервју изрази подготвеност да седне и да се договори и со оние со кои имал различни идеолошки погледи само за да се собори, како што го нарекува, режимот на Никола Груевски. Притоа, според Црвенковски, СДСМ дури и не мора да го даде идниот премиер. Во ВМРО-Народна и во ЛДП се согласуваат дека имаат заеднички политички непријател, не криејќи ја се' поизвесната соработка.

„Коалицијата со СДСМ не е повеќе табу-тема за нашата партија. Се согласувам дека суетите и минатото треба да ги заборавиме и да работиме за доброто и просперитетот на македонскиот народ и држава“, ни изјави вчера Слободан Близнаковски од ВМРО-НП, давајќи до знаење дека некогаш незамисливата коалиција меѓу Љупчо Георгиевски и Бранко Црвенковски станува извесна. Близнаковски тврди дека разговори со СДСМ се' уште не биле почнати. Најпрво ќе се одело на зближување со останатите партнери од коалицијата „Пелистер’“ (ЛДП, Обединети за Македонија и Достоинство), а потоа ќе се разговарало со двете најголеми партии во земјава.

„Како десноориентирана партија, сакаме да му дадеме шанса и на ВМРО-ДПМНЕ, но од она што секојдневно го гледаме на улиците низ нашата земја, како и по Самитот во Чикаго, акцент ќе ставиме на опозициските партии. Македонија станува црна дупка и тоа мора да се спречи“, вели Близнаковски.

Иако Црвенковски, во емисијата „Х/О“ на Канал 5 остави простор воопшто да не дојде до соработка с�� коалицијата „Пелистер“, сепак, се' погласни се гласиштата дека таа ќе биде прогласена за официјална на големиот митинг на СДСМ во Скопје на 2 септември.

„Ги споделуваме точките за кои сме загрижени: застојот во европските и евроатлантските интеграции, демократијата, нарушената безбедност и соживотот, и најважно, катастрофалниот стандард и економската моќ на граѓаните. Тоа создава услови за една заедничка соработка“, ни изјави лидерот на ЛДП, Андреј Жерновски.

Во ЛДП, Народна, Обединети за Македонија и Достоинство вчера се подготвуваа за пат во Охрид каде што ја најавија својата прва трибина со која, како што велат, почнува процесот на делегитимирање на власта. СДСМ, пак, викендов од Струмица ги почнува своите протести и митинзи.

„Сметам дека е добро што двете опозициски групации водат паралелни активности и тоа е нешто што ќе ја разбуди и анимира опозициската атмосфера во Македонија. Сериозна е намерата, време е да се дејствува веднаш“, вели првиот човек на либералдемократите, Жерновски.

Од Народна велат дека им даваат поддршка на социјалдемократите, но нема да излезат на улица, барем не на првиот митинг во Струмица. Како ќе изгледа соработката меѓу двете опозициските коалиции, останува да се види. Црвенковски вели дека најважно е да се тргне Груевски од власт, а потоа, откако земјата ќе се демократизирала, лесно ќе се организирале избори и ќе се видело кому народот ќе му ја довери иднината.