Македонија се уште има проблем со човековите права

Најважен проблем беше владиниот неуспех целосно да го почитува владеењето на правото, оценува Стејт департментот

Стејт департментот на САД излезе со извештај за Македонија во кој се споменува прекумерна употреба на сила во притвор, селективно гонење, недопирливост на полицијата, мешање во работата на медиумите и како главна забелешка - непочитување од страна на владата на владеењето на правото во земјата.

„Најважен проблем околу човековите права беше владиниот неуспех целосно да го почитува владеењето на правото, што се рефлектираше преку мешање во судството и во медиумите, селективно гонење на политичките противници, значајни нивоа на владина корупција и полициска неказнивост“, оценува Стејт Департментот, додавајќи дека постојат кредибилни извештаи исто така дека владата се мешала во високопрофилни случаи поврзани со злоупотреба на функциите за принудување на функционери или партиски членови или за вознемирување на опозициски лидери.

За случајот со Мартин Нешкоски е изнесена оцена дека „бил претепан до смрт“ и дека министерката Гордана Јанкулоска се соочила со голем медиумски притисок заради нетранспарентноста и тоа што веднаш не го идентификувала и уапсила Игор Спасов. Иако законот забранува тортура, според извештајот, постојат кредибилни извештаи дека „полицијата користи екстензивна сила при приведувањето на обвинетите за криминал и ги малтретира притворените и затворениците“. Притоа се наведува дека имало 51 поплака против полицијата за вакво однесување, но не била покрената ниту една дисциплинска постапка, а со тоа се „солидаризираат“ јавниот обвинител и судиите бидејќи судските процеси во вакви случаи се одлагаат до бесконечност.

Извештајот исто така ги споменува таканаречените информативни разговори на полицијата без повиканите да се информираат за правата , а генерално се оценува дека Владата врши политички притисок врз судовите а преку буџетот ја зголемува и контролата врз нив.

„Политичките притисоци влијаат и на работата на Судскиот совет, тело одговорно за избор, дисциплина и отстранување на судиите“, констатира Стејт Департментот додавајќи дека ова тело им дава предност на надворешни кандидати при именувањето место на тие од судската академија.

Се презентираат случаите со неколкуте сменети судии , а особено тој со Трендафил Ивановски со забелешка дека Уставниот суд бил жестоко критикуван. Под графа „политички затвореници и притвореници“ се споменуваат два случаи, на Љубе Бошкоски и Ѓорѓи Тренковски.

За медиумите стои дека има извештаи дека владата ги притиска медиумите и ги присилува новинарите на самоцензура, дека бројот на тие што беа критички кон владата опаднал и дека има разлики во информирањето кај едни и други за контроверзни политички или меѓуетнички прашања.

Како ново извештајот нотира поплаки од политички активисти и други критичари на власта дека им биле следени нивните комуникации на социјалните мрежи и на електронската пошта, но дека нивото на тоа се' уште не е познато.

Во делот за корупцијата стои дека има извештаи за некои функционери вклучени во корупција што се неказнети, но и за други од опозицијата кои се соочуваат со закани за прогон. (С.Ј.)