Затвор за тепачите од Дебар Маало



Мартовскиот инцидент во скопско Дебар Маало, кога пред интернет-кафуле беше претепано 15-годишно момче, доби судска разрешница по само едно одржано рочиште

Една условна казна и три тримесечни казни затвор добија четворицата обвинети на возраст од 19 до 22 години. Според тврдењата пред судот, обвинетите, кои се од околината на Скопје, најпрво биле во интернет-кафуле во Сарај, но таму интернетот бил слаб, па поради тоа дошле во Дебар Маало. Еден од нив изрази жалење и каење за нападот врз малолетното момче од македонска националност, другите, пак, останаа на тоа што го тврдеа во истражната постапка. Судијата, при одмерувањето на казните, ги зел предвид олесните околности.

Серијата инциденти на кои им беше дадена меѓуетничка конотација следуваа по двојното убиство во Гостивар, кога полицаец застрела двајца свои сограѓани поради расправија за паркинг. Во Скопје, Тетово и низ други градови во земјава беа евидентирани низа тепачки, во кои, главно, страдаа млади лица. Во голем број случаи напаѓачите беа откриени, против нив беше поднесувана кривична пријава за насилство, а предметите добиваа судска разрешница. Медиумите објавија дека казните во просек се движеле од условни до тримесечен затвор, со кои се покрива и времето поминато во притвор. (Х.Р.)