24.05.2012, 11:41 Чувари под суспензија, се утврдува дали тепале притворени од „Монструм“
БИТОЛА - Против тројца чувари од битолскиот затвор е поведена постапка за привремено суспендирање поради сомневање за физичко малтретирање на осомничените од акцијата „Монструм“, кои таму ја издржуваат мерката притвор. Првиот човек на затворот„Црн мост“ во Битола , Славко Гацовски, вели дека од денеска ќе почне постапката за утврдување дали чуварите кои биле на смена кога притворениците се пожалиле на малтретирање навистина ги пречекориле своите овластувања.
„По празникот ќе бидат суспендирани. Нема да доаѓаат на работа се' додека не се расчисти случајот. Сепак, според мои сознанија, нема никакво пречекорување на нивните овластување, но да оставиме тоа да го покаже постапката која ќе се спроведе за овој случај“, изјави Гацовски.
Управата за извршување санкции, пак, потврди за медиумите дека директорот на затворот веќе почнал постапка за суспендирање на тројца припадници од секторот за обезбедување поради односот кон осомничените за инволвираност во убиството на петтемина Македонци кај Смилковци.
„Привременото суспендирање е извршено со цел да се овозможи увид и непречено утврдување на фактичката состојба, како и прибирање докази за евентуално утврдување на одговорноста кај овие лица доколку се докаже тоа“, стои во соопштението.
Неодамна, по поплаката на притворениците од „Монструм“ кај народниот правобранител дека биле малтретирани во битолскиот затвор, во Битола дојде и министерот за правда, Блерим Беџети. Тој тврдеше дека не се видел со протворениците, но дека остава целата работа да ја истера до крај раководството на затворот, порачувајќи дека државата ги штити човековите права без оглед на тоа за кого станува збор.
„Сомнежите се за двајца притвореници, но директорот ќе ја разгледа целата ситуација дали тие биле малтретирани. Ако се констатира дека имало малтретирање, тука сме ние, институциите, да ја искажеме цврстата волја дека во нашиот систем не планираме повреда на човековите права и слободи без оглед дали станува збор за притвореници или за затвореници. Согласно со законите ќе се преземат мерки“, порача Беџети. (А.Б.)
|
