Насловна

Колку вредат возилата на „Перо Наков“

Инспекторите на УЈП во акција за присилно наплаќање на долгот од А1 и од „Плус продукција“

Горан Адамовски


Четири возила и еден мотор, од кои три во сопственост на „Плус продукција“ и едно возило на А1, се запленети во вчерашната акција на инспекторите на Управата за јавни приходи на „Перо Наков“. Повеќе од 110 возила, сопственост на двете компании, вчера добија налепница од УЈП откако инспекторите направија попис и процена на вредноста на автомобилите, комбињата и камионите. Двете фирми ќе можат да ги користат возилата, но по петнаесетина дена, УЈП може да ги заплени и да ги даде на аукција, односно на продажба.

Акцијата на инспекторите на паркингот на „Перо Наков“ каде што се сместени фирмите на Велија Рамковски уследи по барањето на УЈП за наплата на околу 10,5 милиони евра, што според нивните процени, ги должат А1 и „Плус продукција“, која ги издаваше дневните весници „Време“, „Шпиц“ и „**** ре“.

УЈП во понеделникот попладне ги извести надлежните во двете фирми дека се наложува сите над 150 возила, сопственост на компаниите, заед��о со сообраќајните дозволи и со клучевите да бидат донесени во кругот на А1.

Четворица инспектори од УЈП вчера околу пладне дојдоа во телевизијата. Откако во соработка со службите на двете фирми ги проверија документите на возилата, излегоа надвор за да ги попишат автомобилите, комбињата и камионите. На возилата им се ставаа налепници на ветробранското стакло (пример: А1 5). Атмосферата беше мирна, вработените во двете компании мирно набљудуваа што се случува.

„Ако ни ги одземат возилата, ќе ни ги одземат и последните можности за колку-толку нормално функционирање“, ни рече главниот и одговорен уредник на А1, Младен Чадиковски.

Дел од возилата беа на терен низ Скопје или во внатрешноста на земјава, па возачите се повикуваа да се вратат. По неколкучасовен попис на возилата, инспекторите си заминаа. Возилата со налепници останаа на паркингот. Вработените ќе можат да ги користат, но останува опасноста за нив по 15 дена инспекторите да се вратат и да ги запленат, а потоа да ги дадат на продажба.

Од А1 сметаат дека при вчерашната акција, УЈП не ги зела предвид жалбите на двете компании за изземање на половина од возилата од постапката за присилна наплата, бидејќи тие биле дадени како залог за кредит во една од домашните банки.

„А1 телевизија веќе побара даночните власти да дозволат плаќање на наводните долгови на рати со што би се испочитувала уставната обврска на државата да овозможи непречено функционирање на компанијата“, се огласија од телевизијата на нивната интернет-страница.

Во УЈП, пак, и вчера повторија дека нивниот став е добро познат.

„Даночните постапки се водат согласно со процедурите и со законите во Македонија. За даночната администрација е најважно што согласно со Законот за даночна постапка, даночниот обврзник е запознат со поединечните даночни акти и оттука нема да се впуштаме во нивно образложување ниту, пак, да ги коментираме шпекулациите на даночниот обврзник“, се вели во одговорот до „Утрински“ што го испратија од Управата за јавни приходи.

Вработените во „Време“ и во „Шпиц“ си ги бараат платите

Новинарите и вработените во дневните весници „Време“ и „Шпиц“ денеска ќе се соберат на протест во дворот од А1 телевизија и ќе побараат исплата на двете заостанати плати што им ги должи сопствеништвото на медиумите. Вработените велат дека за утре е планиран протест и пред надлежниот суд. Освен двете плати, според кажувањата на колегите од весниците, тие ќе побараат и целосно расчистување на односите со сопствениците.

Како што е познато, трите дневни весници на Рамковски престанаа да излегуваат поради неможност да функционираат. Формално, новинарите од весниците се испратени на принуден одмор исто како и најголемиот дел од новинарите во А1 телевизија. (Г.А.)