Ќе се пријавам за премиер на конкурсот на ВМРО-ДПМНЕ. Ветер или ураган од жолтата куќа?!

Најавите за смени во вториот и третиот ешалон на владејачката партија, дочекани со цинизам во политичките кругови

Светлана Унковска


Најавените кадровски чистки во ВМРО-ДПМНЕ со смена на околу 150 раководни лица во вториот и третиот ешалон според Никола Груевски, премиер и претседател на партијата е добра можност да им се даде шанса на нови луѓе кои би биле избрани на конкурси. Новите луѓе ќе можат, според него, да ја покажат својата стручност и способност без оглед дали се членови на партијата. За овие смени за кои дури постои и мото „Нов бран во ВМРО-ДПМНЕ“ ќе се направат промени на раководните позици на државни и на општински органи и институции, но сепак, времето во кое е темпирана оваа ненадејна акција остава простор за размислување зошто токму сега се влечат вакви потези и дали не е ова некој политичко-маркетиншки трик за да се сврти вниманието на јавноста од скандалите што се редат како на филмска лента.

Груевски реши да изврши смена на пониските функционери, а не и на најдоговорните министри кои директно се одговорни за актуелните проблеми што во последно време се повеќе се случуваат и кои се одразуваат врз животот на граѓаните.

„Сакаме да обезбедиме способни и свежи кадри. Ние не сакаме да бидеме како СДСМ, исти луѓе да бидат на функција постојано, независно дали работат или не. Одлуката беше донесена пред неколку месеци, да се направи истражување за да се види како работат некои од функционерите“, изјави Груевски.

Политичките аналитичари различно го оценуваат потегот на Груевски за прочистувањето во своите редови, но се единствени во оценката дека сепак таа треба да почне одозгора па надолу, а не обратно како што е сега поставена.

„Ефектот од овие промени ќе биде поголем и нема да се смета само за козметички промени доколку почне од првиот ешалон, значи од министрите па надолу. Како и да е самиот премиер увиде дека сме во право со она на што укажувавме години наназад дека одредени ресори не функционираат како што треба и дека тоа се случува поради неспособност на кадрите односно поради тоа што приоритет беше партиската припадност“, оценува професорот Јове Кекеновски кој е близок до кампот на десницата.

Кекеновски, сепак, оценува дека иако е задоцнет чекор, најавените кадровски проветрувања во редовите на десничарската партија се за поздравување.Но вели и дека Груевски со овие смени треба да ги опфати сите оние кои не дале задоволителна резултати без оглед на која политичка партија припаѓаат и тука треба да бидат вклучени и кадрите на ДУИ, а не тоа да го прави нивниот лидер Али Ахмети. „Не може функционерите кои ќе бидат сменети да ги менува политичката партија туку премиерот како прв човек на извршната власт“, вели професорот.

Промените на раководните кадри, според аналитичарот Сашо Ордановски укажува на признанието на премиерот Груевски дека тој има една неуспешна екипа и тоа на сите нивоа, не само на пониските. Според него испитувањата покажуваат голем пад на популарноста на партијата и покрај десетиците милиони евра потрешени за пропагандни цели.

„Анкетите укажуваат на големото незадоволство на народот од работењето на ВМРО-ДПМНЕ и ова е само една пи-ар акција. Мислам дека тоа ќе им донесе успех, бидејќи овој народ лесно може да се освојува со вакви потези се' додека им ја исплаќаат минималната плата и пензија. И јас планирам да се пријавам на конкурсите на ВМРО-ДПМНЕ бидејќи Груевски рече дека ќе отвори конкурс за непартиски луѓе и тоа ќе се пријавам за неговото место кога ќе го распише бидејќи тој сепак седи на врвот на неуспехот“, зајадливо забележува Ордановски.

Смената на 150-те раководни личности, навидум може да предизвика уште поголемо незадоволство и раздвижување во редовите на владејачката ВМРО-ДПМНЕ. Но, од друга страна малку е за верување дека, Груевски со поставениот систем на водење на партијата ќе дозволи сериозно да биде разнишан.

„Тие имаат проблем со големото незадоволство бидејќи извесен период врие во партијата. Но секако најлесно е да се менува третиот ешалон и тоа секако дека е ’мачкање очи’ бидејќи проблемот на партијата е во врвот и во погрешниот економски и политички модел што повеќе нема каде да се разбива. За Груевски сите се променливи освен членовите на неговата ’фамилија“, додава Ордановски. Тој оценува дека дури и да се јави некакво незадоволство тоа воопшто нема да биде јавно како што го било и досега.

Со сосема поинакви размислувања е професорот Кекеновски, кој вели дека напротив ваквиот потег само ќе ги зајакне партиските редови.

„Апсолутно нема да значат ништо смената на тие 150 луѓе бидејќи најголем дел од нив се лица кои не се членови на партијата од самото формирање туку од оној момент кога партијата дошла на власт. Напротив, сметам дека ќе ги смири бидејќи и партиската база го поддржува ова на што постојано укажуваше. Постарото членство остана без функции и тука беше големото несогласување и со овој чекор тој ја зајакнува својата позиција во општинските комитети“, вели Кекеновски.

Груевски: Новиот бран промени ќе ја зафати и партијата внатре