В година место сини картони - електронска картичка

Пред да се подигне картичката од ФЗО, вработените треба да уплатат 250 денари на сметката на Министерството за здравство

Јасмина Јовановска

В година сините картони за лекување ќе се укинат. Тие ќе бидат заменети со електронска здравствена картичка, која пред да се подигне од Фондот за здравствено осигурување треба да се уплатат 250 денари на сметка на Министерството за здравство. Толку чини една картичка за вработените, но и за членовите на нивното семејство. Така, едно просечно четиричлено семејство со двајца родители и две деца ќе треба да издвои 1.000 денари за новиот здравствен документ. Повластена цена на електронската картичка од 100 денари ќе има само за пензионери кои примаат пензии до 15.000 денари и невработените, како и за самохрани родители и деца без родители. Предвидена е и бесплатна картичка, која ќе им следува само на социјалните случаи и лицата кои примаат постојана парична помош.

Компјутерската влезница за здравството ќе работи на принципот на кредитна картичка со пин код, за што здравствените установи треба да имаат читачи. Доколку се изгуби, оштети или пак, картичката се блокира поради погрешен код, повторното издавање секој граѓанин ќе го чини 250 денари.

Здравствената визит-карта вработените треба да ја подигнат до крајот на годинава, по што ќе следи издавањето на картичките за пензионерите, за кои се' уште не е одлучено дали лично ќе ја уплатата до ФЗО или, пак, тоа ќе го сторат нивните матични лекари.

За што побрзо да тече издавањето на новите документи, ФЗО од вчера почна да ги прима наплатите. Засега нема рок до кога треба да се подигнат здравствените картички, но од ФЗО упатија апел за што поскоро да се регулираа ова обврска кон Министерството за здравство, за да може и побрзо да ги добијат новите картички. Во Фондот само треба да се достави доказ за направената уплата, која може да биде групна од фирма со над 10 вработени или поединечна од секој осигуреник.

„Правилникот за плаќање на здравствената картичка што го донесе Министерството за здравство веќе е на сила. Известена е државната и јавната администрација дека можат да почнат да уплаќаат за да може да ги подигнат електронските картички“, вели портпаролот на ФЗО, Бранко Аџигогов.

Тој најави дека до септември треба да се издадат околу 150.000 електронски картички за државната администрација. По нив ќе следат картичките за вработените во јавните претпријатија и сите други фирми. Во почетокот на идната година ќе дојдат на ред картичките за пензионерите и за невработените. „Доколку се оди со забрзана динамика, в година треба сите осигуреници да ги добијат електронските картички. За почеток тие ќе бидат замена за сините картони, а од јули 2014 година треба да ги заменат и здравствените легитимации“, додаде Аџигогов.

Колку пари ќе се соберат од здравствените картички и за што ќе се употребат овие пари, од Фондот велат дека не знаат бидејќи тие пари ќе се уплаќаат на сметката на Министерството за здравство, и тие може да одговорат на ова прашање. Од Министерството за здравство не добивме одговор колку пари планира да инкасира од електронската картичка, која требаше да биде бесплатна. Првичните процени се дека од наплатата на овие визит-карти за здравството ќе се соберат околу пет милиони евра.