В година повторно на Евровизија

„Презадоволна сум, пресреќна! За мене и за нашиот евровизиски тим, сепак, најрадосна вест беше дека успеавме да влеземе во финалето. Да го разбиеме малерот! Ех, колку прекрасно чувство...

Валентина Тодоровска

Калиопи, како си? Ова издание на Евровизија навистина понуди интересна програма, силна конкуренција, моќни вокали, перформанси… Колку си задоволна од пласманот, од 12. позиција?

„Презадоволна сум, пресреќна! За мене и за нашиот евровизиски тим, сепак, најрадосна вест беше дека успеавме да влеземе во финалето. Да го разбиеме малерот! Ех, колку прекрасно чувство... Освен тоа, многу интересни песни останаа без пласман и во двете полуфинални вечери, па иако бев без особени очекувања, туку што подобро да ја изведеме песната, сепак се надевав… Сакав да оставам трага, а судејќи по реакциите, задоволна се враќам во татковината“.

Многумина беа обеспокоени со аманетот што го остави пред заминување, дека одиш без оптоварување, туку со цел да ја претставиш Македонија на вистински начин?

„Ме блокираат ветувањата за кои не сум сигурна дека можам да ги исполнам. Не сакав да се оптоварувам со пласмани, бројки, каде што е уметноста нема сметки, нема математика. Мојата најважна мисија беше добар впечаток... Бев како на крилја тие три минути на сцената на Кристалната сала во Баку, и довека се вљубив во „Црно и бело“. Јас сум вечен ентузијаст, кој го живее својот свет со сите плими и осеки, згоди и незгоди, прифаќајќи ги подеднакво силно добрите и лошите страни на туѓите светови“.

Трема?

„Ја немав, но чувствував голема возбуда“.

Шефицата на нашата делегација, Мери Попова, во интервјуто дадено за „Утрински весник“ пред самото заминување прв пат прогнозираше дека ќе имаме финале и добар пласман, бидејќи годинава сме со комплетен „пакет“ - и пејач и песна. Патем имаше и силна екипа околу себе?

„Тоа е просто неверојатно. Музиката секогаш ми ги креираше патеките по кои се движев. Поведена од сопствената интуиција, ги пронаоѓав луѓето и вистинското време кога одредени нешта треба да ми се случат. Така и сега“.

Новинарите што ја следеа Евровизија во Баку, ти беа особено наклонети. Не ме изненадува, и тука имаш добра комуникација со седмата сила?

„На мое огромно задоволство, од страна на медиумите и надвор од нашите граници, наидов на огромна почит како и на висока професионалност. Сепак, дома си е дома, тука новинарите ме доживуваат како своја и, се разбира, нашата комуникација секогаш ќе биде поинаква, поемотивна…“

Според нивните гласови, ти се пласира на 6. место, ја доби престижната награда на Национална музичка академија на Азербејџан… Од учесниците беше прогласена за морален победник… Сето ова ми звучи како да остави нешто недовршено, можеби за следната година на Евровизија?

„Зошто да не? Евровизија е вистинско чудо и навистина уживав овие две недели колку што бев во Баку. Инаку, најмногу се израдував за тоа што ме нарекоа - морален победник. Мислам дека за еден уметник нема поголема сатисфакција од тоа“.

Ќе смени ли Евровизија нешто во твојата кариера? И што мислиш за годинешната победничка, претставничката на Шведска?

„Лорин е дефинитивно голем артист, со убиствен перформанс. Ми се допадна многу, фантастична е. Што се однесува до мојата професионална иднина, верувам дека нештата драстично ќе се сменат - остварив многу контакти, познанства, па и пријателства со многу музичари, продуценти... Времето ми е сојузник, и овој пат, првин ќе скокнам, па ќе речам - оп!“