СДСМ ги дефинира условите за учество на изборите

На денешната вонредна седница на Централниот одбор, социјалдемократите ќе ja разгледаат актуелната политичка состојба и ќе донесат крупни одлуки за идното политичко дејствување

Наум Котевски


Можно ли е ден по Божик најголемата опозициска партија СДСМ од своето седиште на Бихаќска да испрати сигнал на надеж за отплеткување на политичкиот јазол во кој се заплетка државата по „црниот понеделник“ во Собранието? Заморената јавност со нетрпение ја очекува денешната вонредна седница на Централниот одбор, на која социјалдемократите треба да ги разгледаат сите аспекти на актуелната политичка состојба и, како што најавија, да донесат крупни одлуки за идното политичко дејствување на опозицијата.

На седницата, освен членовите на Централниот одбор, ќе бидат присутни и претседателите на сите општински организации на СДСМ низ Македонија, заедно со пратениците, градоначалниците и досега утврдените кандидати за градоначалници.

Официјално од СДСМ не откриваат каков епилог може да очекува јавноста од вонредната седница, но неофицијално се дознава дека минимални се шансите да се донесе одлука за бојкот на изборите. Од извори од партијата се дознава дека по продлабочување на политичката криза и ставот на Брисел дека не го поддржува вонинституционалното дејствување, социјалдемократите ќе ретерираат од радикалната позиција за бојкот на изборите.

Но, тоа не значи, велат изворите, дека ќе се согласиме на политичка пресметка со актуелните изборни правила на игра. Претседателот на СДСМ, Бранко Црвенковски, уште пред три недели по седницата на Централниот одбор, на која од партијата беа исклучени некогашните високи функционери Владо Бучковски и Димитар Бузлевски, изјави дека социјалдемократите сакаат јасно да порачаат дека овој пат нема да помине политиката на власта за одолжување, а потоа ставање пред свршен чин, како пред парламентарните избори во 2011 година.

Потпретседателот на СДСМ и градоначалник на Струмица, Зоран Заев, пак, на отворениот граѓански парламент на плоштадот во Струмица во петокот рече дека опозицијата сака избори, но такви во кои партиските гласови нема да бидат купени. Заев, меѓу другото, најави дека СДСМ денеска ќе излезе со разумни услови, но побара и разум од владејачката гарнитура за да се надмине кризата.

Извори од СДСМ велат дека опозицијата во никој случај нема да отстапи од барањето за неопходните измени во Изборниот законик според препораките на ОБСЕ и на ОДИХР, како и од барањето за засилен мониторинг. Во игра, наводно, и покрај тоа што во партијата се свесни дека однапред е осуден на неуспех, ќе остане и предлогот за формирање друг формат на Влада, без разлика како таа би се нарекла, „техничка“, „експертска“, во која СДСМ воопшто не е заинтересиран да учествува, а чиј единствен мандат би бил организирање фер, слободни и демократски избори.

И покрај тоа што портпаролот на Европската комисија, Себастијан Брабант, ги повика лидерите на сите политички партии и нивните поддржувачи да им стават крај на овие конфронтации и да се однесуваат во согласност со Уставот и законите, како и да дејствуваат низ расправа во Собранието, што предизвика разочараност кај опозицијата, сепак, СДСМ се надева дека на крајот меѓународниот кредибилен фактор ќе застане зад денешните предлози.

И коалициските партнери на социјалдемократите, кои не се толку жестоки во реториката, со нетрпение ќе ја чекаат одлуката од „Бихаќска“.

„Верувам дека може да се најде решение. Оној што не верува во разговор не треба ни да се занимава со оваа професија“, вели висок функционер на партија-членка на „Сојузот за иднината“.