11.01.2013, 15:39 Мијалков гo тужи Фокус за клевета
Директорот на Управата за безбедност и контраразузнавање, Сашо Мијалков, поднесе тужба против дневниот весник „Фокус“, против новинарите Јадранка Костова и Владо Апостолов и против екс-амбасадорот Игор Илиевски од кои ќе бара отштета за клевета во износ од 27.000 евра.
Како што велат од адвокатската канцеларија, тужбата е поднесена заради изнесени навреди и клевети во два наврати во дневниот весник. Првиот текст во кои се изнесени невистините за Мијалков е под името „Избегав поради притисокот од Сашо Мијалков“ и се однесува на сведочењето на поранешниот амбасадор на Македонија во Чешка, Игор Илиевски , каде тој изјавува дека се откажал од својата функција поради притисоците на директорот на УБК, а вториот текст го носи насловот „Амбасадата во Чешка под закана за бомби, МНР не мрда со прст.“
„Ноторна лага е тоа што е објавено во дн��вниот весник „Фокус“. Ова ги преминува сите граници на пристојност и клиентот Сашо Мијалков се одлучи на тужба бидејќи не постои друг начин да се спречи злоупотребата на некои лица да користат медиуми за да изнесуваат лаги и невистини против него. Тоа што беше објавено во два последователни броја на дневниот веник „Фокус“ е апсолутна невистина и ние поднесовме тужба за клевета според новиот закон за граѓанска одговорност за навреди и клевети“, стои во изјавата на адвокатот Антонио Апостолски.
|
