Состанокот во Атина - корисен и конструктивен

Грчките медиуми тврдат дека на средбата со медијаторот била потврдена високата доверба и почит на Грција во меѓународната заедница за нејзиниот конструктивен приод и иницијативи

Сите грчки медиуми јавуваат за вчерашната средба на медијаторот Метју Нимиц со министерот за надворешни работи Димитрис Аврамопулос, кои „неочекувано ги посети“ и премиерот Андонис Самарас.

Повеќето медиуми, меѓу кои и „Та Неа“ ја пренесуваат изјавата на Аврамопулос, што беше објавена преку соопштение од грчкото МНР, дека Грција ги поддржува напорите на Нимиц во врска со името на Македонија. Весни��от исто така пишува дека на Аврамопулос детално го информира Нимиц за грчкиот предлог за потпишување меморандум за разбирање со цел да му се даде импулс на преговарачкиот процес под покровителство на ОН и во кој се поставува рамка и параметри за решение на прашањето.

Под наслов „Презентирани детални идеи за прашањето за името„, весникот „То Вима“ пишува дека Метју Нимиц по неколку месеци се вратил на „местото на злосторството“ во нов обид да ја отклучи вратата која води кон решавање на прашањето за името.

„Елефтеротипија“, меѓу другото, нагласува дека медијаторот го истакнал важниот придонес на грчкиот меморандум за разбирање.

Повеќето медиуми ја пренесуваат веста на државната новинска агенција АНА-МПА која, повикувајќи се на грчки дипломатски извори, пишува дека состанокот бил корисен и конструктивен. Медиумите тврдат дека на средбата била потврдена високата доверба и почит што ја ужива Грција во меѓународната заедница за нејзиниот конструктивен приод и иницијативи.

И „Скај“ го пренесува задоволството на Нимиц за ставот на Грција за прашањето за името. Според телевизијата, Аврамопулос ја истакнал волјата на Грција да се постигне напредок во дискусиите меѓу двете страни.

Интересно за сите медиуми е ненајавеното присуство на премиерот Андонис Самарас на средбата кое повеќето го нарекуваат „изненадна посета“.

Под наслов „Мистерија од состанокот Самарас – Нимиц“, „Прото тема“ пишува дека „одеднаш дошло до неочекувана мобилност за прашањето за Скопје“.

„Фактот што средбата која беше закажана за 12 и 30 беше презакажана за порано за да може да присуствува и премиерот Андонис Самарас создаде атмосфера на мистерија. Сето ова затоа што за време на претходните посети на Атина Метју Нимиц беше примен од секој премиер во официјалната резиденција Максимос и не е вообичаено шефот на грчката Влада да доаѓа во Министерството за надворешни работи“, пишува „Прото Тема“.

Грчките медиуми ги пренесуваат и реакциите на партиите Сириза и Независни Грци. Ставот на Сириза останува дека единствено прифатливо решение мора да биде сложено име во географска одредница за сите употреби.

Пратеникот на Независни Грци и шеф на секторот за надворешна политика Теренс Куик во соопштение ги критикува медиумите што се занимавале со предлозите „Република Северна Македонија“, „Република Нова Македонија’ без да обрнат внимание на ништо друго. „Никој не се занимава со фактот што владата на Андонис Самарас, кој поради прашањето за името уништи три години од владата на Нова демократија, веќе одлучила да го даде името на грчка Македонија“, се вели во изјавата на Куик.