Амбасадорот Стефков го топи мразот во Атина

Атина - Македонскиот амбасадор во Атина, Сашко Стефков, имаше средба со грчкиот заменик-министер за надворешни работи, Димитрис Куркулас. На средбата, која беше оценета како протоколарна и редовна дипломатска активност, била реафирмирана желбата за соработка за европските прашања меѓу двете страни. Како што се дознава, средбата била по барање на амбасадорот пред неколку месеци и не е директно поврзана со минатонеделната посета на медијаторот Метју Нимиц во регионот.

На средбата се дискутирало за соработката во европските проекти и економска соработка, а станало збор и за европската перспектива на нашата држава. Таа поминала во позитивна клима, при што од грчка страна се говорело за напорите за помош на државите од Западен Балкан на нивниот европски пат, односно Агендата 2014. Што се однесува до европскиот напредок на Македонија, Грција очекува поконструктивно однесување од македонската Влада и се надева да види позитивни чекори што ќе доведат до напредок во преговорите, но и во подобрувањето на добрососедските односи.

Ова е втора средба на амбасадорот со Куркулас, по онаа на која амбасадорот го предаде македонскиот одговор на грчкиот меморандум. Амбасадорот Стефков во август имаше билатерална средба и со шефот на грчката дипломатија, Димитрис Аврамопулос, со кого тогаш се дискутираа подетално односите меѓу Македонија и Грција, како и потребата да се најде решение за дводеценискиот спор за името. (М.П.)