(ФОТО) Со „калашников“ нападната централата на Нова демократија  

Во просториите на владејачката партија во Атина биле испукани девет куршуми, еден завршил и во канцеларијата на Андонис Самарас

Од нашиот дописник
Миркица Поповиќ

Атина – Со вознемиреност од ескалирање на вооружени терористички напади осамна новата недела во Грција, по истрелите од „калашников“ упатени кон главното седиште на владејачката Нова демократија во Атина. Непознати лица пред зори во понеделникот извршиле вооружен напад на седиштето на партијата, но поради фактот што нападот бил околу три часот изутрина по локално време зградата била празна и нема повредени.

Еден од куршумите ја погодил директно канцеларијата на премиерот Андонис Самарас, а во зградата биле најдени уште девет испукани куршуми. Овој напад на седиштето на партијата предизвика вознемиреност затоа што е седмиот по ред напад во рок од една недела. Викендов непознати лица со молотов коктел ја нападнале куќата на братот на владиниот потпарол Симо Кедикоглу во Ексархија, а минатата недела со молотови беа нападнати и домовите на петмина грчки новинари.

Владата и останатите политички партии го осудија вооружениот напад и побараа да се стори се' што е возможно за да се најдат сторителите.

Полицијата трага по сторителите, а се проверуваат и сите безбедносни камери во обид да се откријат напаѓачите. Од она што е до сега познато две маскирани лица во три часот изутрината со „калашникови“ ја нападнале зградата. Некои од очевидците тврдат дека можеби имало и трето лице. Не е јасно дали испуканиот куршум кој е најден во канцеларијата на Самарас во партиското седиште случајно залетал таму или била намерна цел и директна порака до грчкиот премиер. Грчкиот премиер од преземање на премиерската функција веќе не работи од канцеларијата на седиштето на партијата на булеварот „Сигру“.

Владиниот потпарол Кедикоглу истакна дека целта на нападот била токму канцеларијата на Самарас, коментирајќи дека се создава вознемирувачка ситуација и обид за заплашување на општеството. „Треба да покажеме дека државата не може да се тероризира. Нема добро или лошо насилство. Насилството е едно и треба да биде отфрлено од нашето општество“, истакна Кедикоглу. Владиниот потпарол изминатата недела обвини дека зад нападите можеби стои опозициската СИРИЗА, а во денешните изјави оцени дека се сомнева дека зад нападот стојат симпатизери на екстремната левица и анархисти.

Опозициската СИРИЗА го осуди нападот и побара од владата да го искористи моментот да се најдат сторителите кои се обидуваат да создадат клима на паника, терор и страв во општеството, а не само да се обвинуваат нивни членови кои тврдат дека не се инволвирани во вакви напади.

„Нападот на канцеларијата на Нова демократија е опасно ескалирање на безизлезни терористички активности на слепо насилство и апсолутно се осудени од стана на СИРИЗА. Ваквите случувања се обидуваат да го свртат вниманието од актуелните проблеми и создаваат клима на тероризам и репресија“, стои во реакцијата на опозициската левичарска партија. Премиерот Самарас телефонски разговарал со лидерот на СИРИЗА, Алексис Ципрас, како и со лидерот на ПАСОК, Евагелос Венизелос.

ПАСОК го осуди нападот и коментираше дека овие активности покажуваат дека во Грција постојат кругови кои користат насилство против државата, додека пак третата партија во владината коалиција Демократска левица го осуди настанот како „терористички напад“. Осуди за терористички и бомбашки напади и насилство против државата упатија и од Комунистичката партија и десничарската Независни Грци.

Со доза сомнеж дали можеби овој напад е испланиран од самата партија се јави пратеникот на СИРИЗА и еден од признатите борци против грчкиот фашистички режим, Манолис Глезос. Тој ја постави дилемата дали можеби зад нападот стојат огранизации кои се во пријателски врси со Нова демократија, која според него можеби ќе има корист од овој напад. „Сметам дека е неприфатливо секогаш кога има вакво случување, против која било партија, ние да сме под лупата и да не' сметаат за виновни и да мора да одговараме. Можеби нападот доаѓа од организации пријателски кон Нова демократија“, истакна Глезос. Неговото прашање веднаш наиде на реакција од парламентарниот претставник на владеачката партија, Макис Воридис кој отфрли секакви обвинувања дека владата се обидува да го тргне фокусот од големите финансиски проблеми и да го преориентира кон проблемите со тероризам во државата.