11.01.2013, 12:45 „Евро“ на кирилица на банкнота од пет евра
Европската централна банка (ЕЦБ) претстави нова банкнота од пет евра со подобра заштита од фалсификување на која првпат зборот „евро“ ќе биде испишан и на кирилица. Единствена земја која користи кирилица во ЕУ е Бугарија, која не е членка на еврозоната, па испишувањето на зборот „евро“ на кирилица се толкува како политички сигнал на доверба на ЕЦБ за идното проширување на зоната во која се користи заедничката европска валута.
Од Бугарска народна банка, пак, велат дека ова е историски чин што кирилицата влегува во употреба во еврозоната и се проширува влијанието на еврото како глобална валута. „Така повеќе од над 200 милиони луѓе на светот што ја користат кирилицата, меѓу кои се и жителите на Бугарија, како членка на Европската унија, ќе можат на своето национално писмо да го прочитаат текстот напишан на б��нкнотата“, информираат од Бугарската централна банка.
Кириличното писмо го користат и две земји-кандидати за ЕУ, Македонија и Србија. Новата банкнота има топли бои и ја краси портрет на феникиска принцеза Европа од грчката митологија. Ликот на божицата е преземен од вазна стара 2.000 години, а која се наоѓа во музејот „Лувр“ во Париз.
На прв поглед разликите меѓу досегашните евробанкноти и оваа се минимални, но тие стануваат многу позабележливи при допир, зашто во нив се втиснати истакнати линии на левиот и десниот ќош.
Новата банкнота ќе влезе во оптек на 2 мај 2013 година, а таа беше претставена од претседателот на ЕЦБ, Марио Драги. (Ек.Р.)
|
