10.01.2013, 15:53 Хаки Азири: „Стравувам за сопствениот живот“
Сведочење на првичниот заштитен сведок во „Монструм“, кој се појави како обвинет на судењето
Љубиша Станковиќ
„Ова што се случи за мене е вистинска катастрофа. Јас се грижам само за моето деветчлено семејство и ништо повеќе. На 1 мај, прв пат во мојот живот влегов во полициска станица. Јас не сум криминоген лик и немам никакво досие“, рече на денешното продолжение несудениот заштитен сведок, сега обвинетиот Хаки Азири.
Колкаво е значењето на Хаки Азири за целиот тек на судската постапка која се води за обвинетите за петкратното убиство кај Железарско Езеро, најдобро говори тоа што судијата Ивица Стефановски ги отстрани другите тројца присутни. Стефановски му предочи на обвинетиот дека во текот на истрагата дал обемен исказ, кој се однесува на трагичниот настан од 12 април минатата година, но Хаки Азири рече дека нема да остане на она што го изјавил на 7 мај минатата година, кога бил повикан како сведок.
„Не го прифаќам обвинението. Не знам што да кажам. Исказот што го дадов пред истражен судија не го дадов по своја волја, туку под притисок. Јас, сега, стравувам за сопствениот живот“, изјави обвинетиот Хаки Азири и појасни дека извршувања убиства не се негово убедување, а за случајот разбрал преку интернет.
Прашан за денот кога беше извршен масакрот кај Железарско Езеро, Хаки Азири рече дека тој ден бил слободен, односно дека во претпладневните часови бил на кафе, а потоа заминал во џамија и на крајот од денот си заминал дома.
Што се случувало ден пред трагичниот настан Азири не кажа, бидејќи не се сеќавал, но потврди дека Алил Демири му е братучед и дека токму тој, во 2009 година, го запознал со браќата Агим и Африм Исмаиловиќ.
Хаки Азири негираше дека ги превезувал обвинетите низ Скопје, а кажа дека во селото Брест не бил повеќе од три години и покрај тоа што Обвинителството тврди дека токму тој помогнал бегалците да ја напуштат државата на илегален премин во атарот на споменатото скопско село.
По кратката пауза судот одлучи да го прочита исказот кој Хаки Азири го дал пред истражен судија, а кој многу се разликува од денешниот.
Имено, една од главните поенти на исказот кој Хаки Азири е и неговото заминување на Косово каде што четири дена престојувал кај неговиот братучед Иса Биљали.
Сведокот кажа дека во деновите кога бил чуван во Кочани имал третман на заштитен сведок, но кога разбрал за што се работи самиот побарал да го изгуби таквиот статус, а потврди дека неговиот брат Адем Азири живее во Каиро каде што студира теологија, но и тоа дека знае да ракува со оружје. На рочиштето во својство на оштетени се појавија и родителите на петтемина загинати.
|
