(ФОТО) Бесими: Станавме земја која го „извезува мирот“

Вкупно 156 старешини и професионални војници заминаа на мировна мисија во Кабул

Вкупно 156 старешини и професионални војници на македонската армија, денеска заминаа за Авганистан. Припадниците на Првата механизирана пешадиска бригада на АРМ ќе бидат дел од мировната мисија ИСАФ. Во следните шест месеци додека трае мисијата, „скорпиите“ ќе извршуваат различни должности, од кои најзначајната и најодговорната е обезбедувањето на главниот штаб на мисијата ИСАФ, патролирање во зоната на одговорност во Кабул, борбено обезбедување на комуникации и области во зависност и од потребата на мисијата.

Министерот за одбрана, Фатмир Бесими, кој беше присутен на денешното испраќање на војниците во штипската касарна „Јане Сандански“, нагласи колкаво е значењето на мисијата во Авганистан за меѓународниот углед на нашата земја и за евроатлантските интеграции.

„Историјата на нашите миротворци во Авганистан ги потврдува одличните резултати кои ги постигнуваат припадниците АРМ со својот професионализам и одговорност кон задачите што од нив ги бара благородната мисија“, оцени Бесими.

Тој истакна дека од земја „увозник на мир“ - станавме земја која го „извезува мирот“. Министерот ја нагласи потребата од поинаков пристап кон современите безбедносни закани и важноста на цивилно-воената соработка за оперативниот успех. Според него, „од научените лекции стана јасно дека без разлика на се', крајната цел и напорите во Авганистан, НАТО и партнерите нема да ја остварат доколку не успеат да ја задржат лојалноста на населението“.

„Не се согласувам со некои ставови дека патот во Авганистан е загубен во маглата на постконфликтното дејствување. Напротив, статистиката за успехот на авганистанската полиција и авганистанската национална армија, упатуваат на поинаков заклучок“, смета Бесими.

Командантот на штипската касарна, бригадниот генерал Стојан Димчов, рече дека пред еден месец ги посетил војниците во Авганистан, при што претставниците на НАТО дале највисоки оценки за нашите војници. Командантот на контингентот на АРМ што заминува во Кабул, Стојанче Тодоров, рече дека е голема чест да се предводат професионалци, кои ќе одговорат на дадените задачи.

Од Министерството за одбрана потенцираат дека групата е од мешан етнички и полов состав (учествуваат четириесетина припадници на албанската заедница, како и пет жени). (Г.А.)