Откриена скулптура од 2 век во атарот на Тополчани

Жителите на прилепското село ја пронашле скулптурата случајно при откопување на темелите од селската црква „Свети Спас“

Моника Талеска

Мермерна скулптура без глава која потекнува од 2 век од римскиот период, чија должина е 1,80 см, е откриена во атарот на прилепското село Тополчани. Жителите на селото ја пронашле случајно при откопување на темелите од селската црква „Свети Спас“, која функционирала пред 150 години. Восхитени од ова откритие, но и суеверни зашто ја откопале на оваа локација, стравуваат дека ако истата се премести од селото, несреќа може да следи некого од жителите. Тие два дена одбиваа да ја преда��ат скулптурата на прилепскиот Завод и Музеј.

„Бараме симболичен материјален надоместок, но не како противвредност на скулптурата, туку како помош за изградба на некогашната селска црква. Скулптурата ја сметаме како наше богатство, од селото и сакаме тука да остане, во дворот на црквата. Но, кога веќе не може да се постигне тоа, тогаш барем да ни помогне градоначалникот на Прилеп, Марјан Ристески, да го заградиме ова место околу црквата, па кога ќе има можности, ќе градиме. Бидејќи Тополчани е населено со Македонци, православни граѓани“, изјави Јован Балабаноски, член на Црковниот одбор на селото.

И покрај два часа натегања, сепак, вчера жителите на Тополчани се договорија во присуство на полиција и инспекторите од Управата за заштита на културното наследство да ја предадат скулптурата дозволија таа да биде подигната и однесена во Завод и музеј - Прилеп.

„Еве сега прв пат откриваме дека освен локалитетот Стибера, во околината на селото Тополчани има нов локалитет каде што е пронајдена многу вредната скулптура. Овој репертоар на скулптури го имаме и на локалитетот Стибера, каде што се најдени скулптури во голем број во гимназионот и на други места, а дел се наоѓаат во лапидариумот во Куршумли-ан во Скопје и во Музејот во Прилеп. Можеби ќе се откријат и други наоди, но ќе видиме, сепак, што ќе се прави натаму, сега е рано да зборуваме“, вели Звонимир Николоски, советник-инспектор за археолошки локалитети во Управата за заштита на културното наследство.

А според Илчо Бојчески, раководител на Одделот за превенција во Управата, овој експонат ќе биде преместен во Музејот во Прилеп, а понатаму ќе се утврди дали ќе се извршат сондажни рекогносцирања на теренот каде што е пронајдена скулптурата, за да се дознае дали станува збор за случаен наод, но и дали може да има и други такви наоди.

Жителите на Тополчани добиле ветување дека ќе добијат одредена помош од Општина Прилеп за изградба на селската црква.