Опозицијата ќе организира карвани и низ Македонија

Гордан Георгиев, потпретседател на СДСМ, ги најави натамошните активности, кои ќе се фокусираат на протестни маршеви и граѓански парламенти

Опозицијата од денеска го сели граѓанскиот парламент низ земјава. Во план е да се организира карван, кој ќе помине во поголемите градови, каде што секој работен ден ќе се организираат протестни маршеви и граѓански парламенти. Карванот ќе почне од Прилеп – градот револуционер, каде што денеска од 18 до 19 часот раководството на СДСМ, како и раководствата на партиите од „Сојузот за иднината“, заедно со граѓаните на Прилеп ќе маршираат низ улиците на градот. Маршот ќе заврши со граѓански парламент на кој граѓаните ќе ги изнесуваат своите ставови и мислења. По Прилеп, граѓанскиот парламент се сели во Струмица, в четврток во Штип, а в петок во Охрид. Ваквото дејствување на опозицијата го најави вчера Гордан Георгиев, потпретседател на СДСМ.

„Во меѓувреме додека организираме граѓански парламенти низ државата, отпорот во Скопје ќе го продолжиме, за почеток со блокирање по една раскрсница секој работен ден“, најави тој на вчерашната прес-конференција. Блокадите ќе бидат во времетраење од половина час од 12 до 12,30 часот, почнувајќи од денеска со полчасовна блокада на раскрсницата меѓу улиците „Партизанска“ и „Рузвелтова“ кај „Симпо“.

„Свесни сме дека тоа ќе предизвика непријатности и нервоза кај граѓаните, затоа во оваа пригода ги повикуваме скопјани да имаат разбирање за блокадите, имајќи предвид дека уличниот отпор останува единствено средство за борба против овој режим“, вели Георгиев.

Тој додаде дека „ако власта не се вразуми и не покаже волја за политички дијалог со кој би се надминала политичката криза, интензитетот на отпорот и граѓанската непослушност како низ градовите од внатрешноста така и во Скопје ќе се зголемува“.

Од СДСМ се децидни дека граѓанската непослушност и уличната демократија се единствените инструменти кои им преостануваат. „Лицемерните повици да не' вратат во Собранието од каде што насилно не' исфрлија, нема да не' поколебаат и да не' одвратат од намерата да им ја вратиме државата на граѓаните, а Уставот и законите повторно да станат основните начела на функционирање на државата“, е ставот на опозицијата. (Д.Т.)