(ФОТО) Француските копнени сили се упатија кон северно Мали

Советот за безбедност на Обединетите нации ја поддржа едногласно интервенцијата на Франција против исмалистичките бунтовници во Мали

Француските копнени сили се упатија кон северно Мали каде се стационирани исламистичките екстремисти, изјави изутринава францускиот министер за одбрана, Жан Ив Ле Дриан.

- До сега имавме одреден број копнени сили во Бамако, за да го заштитиме населението - нашите граѓани, европските граѓани и жителите на главниот град. Сега француските копнени сили се упатија кон север, изјави министерот за радиото Ер-Те-Ел.

Тој истакна дека француската интервенција тече добро во источниот сектор на зоната на конфликтот. - Малку потешко е на запад, каде се судираме со пофанатични, подобро организирани, понеколебливи и подобро вооружени групи. Напредуваме и таму но потешко, додаде тој.

Министерот за одбрана истакна дека уште од самиот почеток Франција била свесна дека станува збор за мошне тешка операција. - Имаме работа со стотици можеби и над илјада, 1.200 до 1.300 терористи во регионот, додаде Ле Дриан.

Тој истакна дека операцијата се одвива подобро од минатата недела и нагласи дека битката продолжува и оти ќе трае уште долго.

Целта на операцијата како што рече Ле Дриан, е Мали да си го поврати суверенитетот на целата територија. Од почетокот на воената интервенција на 11 јануари Франција распореди 800 војници во Мали при што планира постепено својот контингент да го зголеми до 2.500.

Началникот на Генералштабот на француските вооружени сили адмирал Едуар Гио нагласи дека француските сили се соочени со конфликт од партизански тип, ситуација за која тие се подготвени.

- Она што успеавме да го уништиме се два вида на цели: неподвижни во кои спаѓаат кампови за обука, логистички објекти, командни центри, како што беше случајот во Дуенца или Гао и подвижни. Терористичките групи одзедоа оклопни возила од силите за безбедност на Мали, но ние уништивме дел од нив синоќа со нашите хиликоптери и авионите, рече Гио.

Три четвртини од Французите ја поддржуваат француската воена интервенција во Мали покажува денеска објавената анкета на Институтот Бе-Ве-А за францускиот весник „Паризиен“.

СБ ја поддржа интервенцијата на Франција во Мали

Советот за безбедност на Обединетите нации ја поддржа едногласно интервенцијата на Франција против исмалистичките бунтовници во Мали, кон која, како што рече францускиот претседател Франсоа Оланд треба да се приклучат и африканските сили во рок од една недела.

По вонредната седница на СБ во Њујорк, одржана на барање на Париз, амбасадорот на Франција Жерар Аро изјави дека неговата земја има „разбирање и поддршка“ од сите 14 останати членки на ова тело.