(ФОТО) Ракометарите ја „избраа" Германија



Пораз од Данска со 33:30, кој во осминафиналето носи дуел со „панцерите" в недела од 15,45 часот

ФОТО (Специјално од Севилја): Петр Стојановски

На македонските ракометари им се исполни желбата и во осминафиналето на Светското првенство во Шпанија нема да играат со бранителот на титулата Франција, откако во последното коло од групата Б загубија со 33:30 од Данска и завршија на четвртото место. Тоа носи дуел со Германија в недела од 15,45 часот во Барселона за место меѓу најдобрите осум селекции на мундијалот.

Последниот натпревар во салата „Сан Пабло" помина во обострано тактизирање, имајќи предвид дека Данците секако ќе беа први, а Македонците со победа трети, па во осминафинал��то ќе играа со непосакуваните „триколори". Тие денеска загубија од Германците со 32:30 и паднаа на второто место во групата А, па во осминафиналето ќе играат со Исланд.

Во ситуација кога победата, очигледно, не беше императив, не се претргнаа ни избраниците на селекторот Звонко Шундовски ни тие на неговиот колега Улрик Вилбек, па мечот повеќе личеше на тренинг во кој резултатот е најмалку важен. Речиси пријателскиот карактер на средбата се гледа и од фактот дека првото исклучување на две минути се случи дури во 36. минута, кога на „ладење" на клупата замина дански ракометар.

Македонија во два наврата имаше предност од по три гола (7:4 во првото полувреме, 20:17 и 22:19 во второто), но по 25:25 во 48. минута Данците направија серија од пет гола без одговор, која се покажа решавачка за победникот. По 13 играчи од двата тима се запишаа во листата на стрелците, при што најефикасни беа браќата Кирил и Филип Лазарови во македонскиот и Микел Хансен во данскиот, сите со по пет гола.

Необиечен натпревар - необична и одлука за МВП: организаторот наградата му ја додели на данскиот селектор Вилбек! (Р.Д.)




Данска - Македонија 33:30

Полувреме: 13:14. Сала: "Сан Пабло" во Севилја. Гледачи: 3.600. Судии: Кулибали и Дијабате од Брегот на слоновата коска. Седмерци: Данска 2/2, Македонија 1/3. Исклучувања: Данска 4 мин., Македонија 8 мин. Загубени топки: Данска 7, Македонија 15.

Данска: Ландин (4 одбрани), Грин (6+2 одбрани), Ларсен 1/2, Мортенсен 2/4, Егерт 4/4 (2/2), Маркусен 1/3, Лауге 3/4, Спелерберг 2/3, Недезбо 0/1, Сван 3/5, Линдберг 2/3, Р. Тофт 2/3, Мелгорд 3/6, Сендергорд 4/6, Х. Тофт 2/3, Хансен 5/8. Селектор: Улрик Вилбек.

Македонија: Митревски (5 одбрани), Ристовски (9 одбрани), Манасков 2/4, С. Стоилов 1/1, К. Лазаров 5/9 (1/3), Јоновски 1/1, Ангеловски 1/4, Темелков 1/2, Миркуловски 2/4, В. Маркоски 1/1, Н. Маркоски 3/3, Н. Мојсоски 3/5, Димовски 2/2, Георгиевски 3/6, Ф. Лазаров 5/6, Левов 0/1. Селектор: Звонко Шундовски.