Наградени пожарникарите кои интервенираа во „Македонска пошта“

Пожарникарите кои во вторникот го гаснеа пожарот во АД „Македонска пошта“ - Скопје ќе бидат наградени со 30 отсто од плата или околу 10.000 денари, соопшти денеска градоначалникот на Град Скопје, Коце Трајановски.

- Тоа е еден од најголемите пожари што се случил во Град Скопје изминативе 20-тина години. За таа цел сакам да ви се заблагодарам за навремената, брза и ефикасна интервенција што ја направивте. Ги доведовте во опасност и вашите животи, рече Трајановски по посетата на противпожарната станица во Автокоманда.

Според него, наградата за пожарникарите е потврда за нивната успешно завршена работа.

Трајановски потенцира дека е задоволен од функционирањето на Противпожарната единица која е опремена со едно модерно противпожарно возило, шест цистерни - донација од Владата на Република Македонија, чамци... Најави дека наскоро ќе се набави возило со скали во должина од 50 метри и уште едно противпожарно возило. Противпожарната единица е подмладена со 25 пожарникари.

Благоја Менковски командант на Бригадата за противпожарна заштита на Град Скопје додаде дека лани во главниот град изгасиле 1.800 пожари. Тој смета дека кај нив се потребни уште 25 нови вработувања.

Пожарот во АД „Македонска пошта“ - Скопје избувна во вторникот во попладневните часови, а во неговото гаснење учествуваа 40 пожарникари со 20 противпожарни возила.