Владата е клинички мртва, Јанша не се повлече

Три коалициски партии го поддржаа повикот за оставка на словенечкиот премиер Јанез Јанша

Три коалициски партии го поддржаа повикот од претседателот на парламентот Грегор Вирант и неговата Граѓанска листа (ДЛ) за оставка на премиерот Јанез Јанша, кој е обвинет за корупција. ДЕСУС, Словенечката народна партија (СЛС) и Нова Словенија го направија повлекувањето на Јанша како услов за нивна континуирана поддршка за владејачката централнодесничарска коалиција. Предвремените општи избори што се одржаа пролетоска во голема мера се сметаа како единствен начин да се реши социјалната и политичка криза во земјата.

Уште две други коалициски партии се заканија дека ќе ја напуштат словенечката влада ако конзервативниот премиер Јанез Јанша не се повлече по обвинувањата за корупција, продлабочувајќи ги поделеностите во петпартитниот владејачки сојуз.

Словенечката партија на пензионерите, ДЕСУС, и друга помала коалициска партија, централнодесничарската СЛС, ги открија своите ставови во понеделникот. Веќе во саботата ДЛ , друг партнер во владејачката коалиција излезе со иста објава.

„Извршниот одбор на ДЕСУС бара оставка од Јанез Јанша и ако тој не ја поднесе, ние повеќе нема да бидеме дел од оваа коалиција“, изјави лидерот на ДЕСУС и министер за надворешни работи Карл Ерјавец пред новинарите по партискиот состанок.

Оставката на Јанша ќе го отвори патот за предвремени избори „што би претставувале најдобар начин да се сопре распространетото незадоволство меѓу граѓаните“, додаде тој.

И раководството на третиот помлад партнер во коалицијата, централнодесничарската Словенечка народна партија (СЛС), исто така, повика на повлекување на Јанша по партискиот состанок во понеделникот. „Ние очекуваме од тебе (Јанша) во најкус можен рок да предложиш кандидат за претседател на владата што ќе ни овозможи да ги спроведеме потребните реформски мерки“, изјави лидерот на СЛС , Радован Зерјав, пред новинарите по состанокот. СЛС „ќе остане во оваа влада до крајот на февруарската парламентарна сесија“, додаде тој. „Ако ништо не се случи, СЛС ќе излезе од коалицијата“.

СДС ги обвинува и двете партии за „хипокризија“, во одговорот објавен на „Твитер“. „СДС не ги избираше министрите од коалициските партнери во власта, затоа тие (ДЕСУС и СЛС) немаат право да ни диктираат кој ќе биде во власта“, соопшти партијата.

Во извештајот објавен минатата недела, словенечката Комисија за борба против корупцијата го обвини Јанша дека во неколку наврати не ги почитувал барањата да го пријави својот имот и не успеал да го објасни зголемувањето од 210.000 евра во капитал од 2004 до 2012 година.

Во саботата Граѓанската листа на парламентарниот претседател Грегор Виран се закани со напуштање на владејачката коалиција ако Јанша за 10 дена не поднесе оставка. Откако неговата Словенечка демократска партија (СДС) ја отфрли неговата понуда да се повлече од функцијата прв човек на партијата, Јанша ги повика сите коалициски партии да одлучат до понеделник дали сакаат да останат во коалицијата.

Распадот на коалицијата може да доведе до формирање техничка влада или дури и распишување предвремени избори. (АФП)