Убијците од Смилковско езеро се претставиле како полицајци

Сведоците не можеа меѓу обвинетите да го препознаат вооружениот маж што им се заканил дека ќе ги убие

„Стој полиција‘! Како се викате? Враќајте се бргу или ќе ве убијам“. Вака на денешното судско рочиште за случајот „Монструм“, сведочеше Бајрам Мемедов, кој лани на 12 април ловел риба на Смилковското езеро. Мемедов бил на риболов со своите пријатели. Штом се стемнило, тргнале да си одат по споредниот пат кога биле пресретнати од човек со пушка во рацете, кој, според сведоците, носел панцир, бил облечен во црно, но немал маска. Мемедов не можеше меѓу обвинетите да го препознае човекот што ги пресретнал.

Рибарите со трчање побе��нале, а по кратко време слушнале пукање. Мемедов рече дека не видел никого друг. За разлика од него, другиот сведок, Несим Кемал тврди дека зад човекот со пушка имало уште три, четири лица во темна облека. Тој видел и автомобил „караван“ со темносина боја, чии што фарови биле свртени кон езерото.

Сведокот Ахмет Бекир се сеќава дека кога попладнето дошле на езерото, неколку момчиња им побарале леб за да ловат риба. Ниту Бекир не можеше да го препознае вооружениот човек, бидејќи било темно и не го видел јасно.

Одбраната на обвинетите, смета дека сведоците имаат контрадикторни изјави и оти се исполнило нивното очекување со тоа што меѓу обвинетите не го препознале човекот со пушка. Судењето продолжува идниот месец.

Судењето за суровата егзекуција на Кире Тричковски, Филип Славковски, Цветанчо Ацковски, Александар Наќевски и рибарот Борче Стефковски, почна пред еден месец. За Велигденскиот масакр, што ја потресе Македонија, обвинети се Агим Исмаиловиќ, Фејзи Азири, Рами Сејди, Хаки Азири, како и Алил Демири и Африм Исмаиловиќ, кои се во бегство. (Х.Р.)