Груевски: Отворени сме за аргументиран дијалог

Премиерот изрази подготвеност на следните локални избори да има целосен мониторинг од ОБСЕ, ОДИХР, онолку засилен колку што ќе посакаат од СДСМ

„Остануваме  за  дијалог во институциите, дијалог со кој што опозициската СДСМ  ќе се врати во Парламентот, каде ќе разговараме за сите прашања за кои што сакаат да разговараме и да се најдат решенија да се излезе од оваа ситуација“, истакна денеска премиерот Никола Груевски коментирајќи ги последните  политички случувања, како и тоа  дали е можен дијалог со опозицијата.

„Ние сме целосно подготвени  на следните локални избори да има целосен мониторинг ��д ОБСЕ, ОДИХР, онолку засилен колку што ќе посакаат од СДСМ и ќе се согласат од ОБСЕ и ОДИХР. Целосно сме подготвени доколку се' уште сметаат дека има нешто недовршено во избирачките листи тоа да се заврши и да се комплетира за да нема каков било  сомнеж дека на некој начин се сака да се направи нешто што е неетички и незаконски, измама или слично“, рече Груевски.

Тој нагласи дека се она  што практично е услов заради услов или заради неприфаќање со кое всушност, како што рече,  сакаат само да издадат алиби за она што го прават и за остварување на нивните цели - предвремени парламентарни избори.

„Станува јасно дека сето тоа е дел од сценариото на Бранко Црвенковски со кое тој сака да ја спаси својата политичка кариера внатре во партијата. Затоа што знаеме што се' се случува таму“, истакна премиерот Груевски.

Иницијативата на Филе е добра за процесите

Иницијативата на еврокомесарот за проширување Штефан Филе за трилатерална средба во која би се вклучиле шефот на грчката дипломатија Димитрис Аврамопулос и министерот за надворешни работи Никола Попоски е добра за надминување на спорот за името кој ја блокира евроинтеграцијата на државата.

- Нема ништо лошо во тоа. Нека има почести средби, нека се среќаваат министрите. Би прифатил доколку се организира некоја средба со грчкиот премиер. Нашата намера е да бараме решение и да најдеме решение за овој проблем. Ако и нивната намера е таква, тие не би требало да одбегнуваат такви средби. Се надевам дека во иднина ќе ги има почесто и со ваков вид посредници и без посредници, рече премиерот Груевски.